Լիբանանի խորհրդարանի նախագահ Նեպիհ Պըրրիի յայտարարութիւնը` նախագահութեան թեկնածուներուն մասին, պատճառ դարձաւ հակադարձութեան մը ընդդիմադիր ճակատի երեսփոխաններուն կողմէ: Պըրրի յայտարարած էր, որ շիի երեսփոխններու թեկնածուն է Սըլէյման Ֆրանժիէն, մինչ միւս կողմի թեկնածուն կոչած էր ՙխողովակներու ծնունդ՚, այսինքն մէկը որուն արմատները յայտնի չեն: Այս խօսքը բուռն հակադարձութեան առիթ դարձաւ:
Ընդդիմադիր երեսփոխաններ յայտարարեցին, թէ այն ատեն երբ երկիրը կ’ուղղուի դէպի անորոշութիւն բոլոր մակարդակներու վրայ, իշխող ճակատը տակաւին ժամավաճառութեամբ կը զբաղի, յոյս ունենալով ծունկի բերել լիբանանցի ժողովուրդը:
Անոնք կոչ ուղղեցին պատժելու շէյխ Ռիֆահիի ոճրագործները եւ զէնքի սահմանափակում կատարել Պէյրութի եւ այլ շրջաններու մէջ:
Նախագահական թեկնածու Միշէլ Մուաուատ բուռն կերպով հակադարձեց խորհրդարանի նախագահ Պըրրիի յայտարարութեան: Ան Պըրրին կոչեց զինեալ խմբաւորումի ղեկավար մը, որ 30 տարիէ ի վեր բռնագրաւած է խորհրդարանի նախագահի պաշտօնը եւ ներկայիս նախագահական ընտրութիւնը վերածած է քաոսի մը, վարկաբեկելով այդ սահմանադրական պաշտօնը:
Միւս կողմէ, Ընկերվար յառաջդիմական կուսակցութիւնը կոչ ուղղեց ընդառաջելու խորհրդարանի նախագահ Պըրրի հրաւէրին` երկխօսութեամբ լուծելու համար երկրին առջեւ ծառացած բոլոր խնդիրները, ներառեալ երկրի նախագահի ընտրութիւնը:
