Իր գաղութային շրջագայութեան ծիրին մէջ, Սոցիալ ԴԵմոկրատ Հնչակեան կուսակցութեան նաԼիբանանի շրջանի նորընտիր Վարիչ Մարմինի պատուիրակութիւնը, գլխաւորութեամբ ատենապետ ընկ. Վանիկ Տագէսեանի երէկ այցելեց Լիբանանի Հայոց Թեմի բարեջան առաջնորդ գերշ. Տէր Շահէ Արք. Փանոսեանի, որուն հետ արծարծեց գաղութային, հայկական ու լիբանանեան համատեղ հետաքրքրութեան թղթածրարները: Առաջնորդ Սրբազանը շնորհաւորեց Վարիչ Մարմինի ընտրութիւնը եւ նոր կազմին մաղթեց բարեյաջող աշխատանք՝ ի ծառայութիւն գաղութի զաւակներուն: Գնահատելով Վարիչ Մարմինին մէջ երիտասարդ ուժերու ներկայութիւնը, Առաջնորդ Սրբազանը կարեւոր համարեց որ երիտասարդները աւելի աշխոյժ մասնակցութիւն բերեն գաղութային եւ ազգային կեանքին՝ հիմնուելով առողջ սերնդափոխութեան անհրաժեշտութեան վրայ: Խօսելով գաղութային կեանքին մասին, երկուստէք շեշտուեցաւ միասնականութեան հրամայականը, որուն միջոցաւ կարելի է ապահովել լիբանանահայ գաղութի կենսունակութիւնը եւ լիբանանահայութեան բարեկեցիկ կեանքը: Անդրադարձ կատարուեցաւ Լիբանանի ծանր վիճակին եւ ժողովուրդի դիմագրաւած բազում խնդիրներուն, ու ժողովականները շեշտեցին, թէ ազգային կառոյցները պէտք է շարունակեն իրենց աշխոյժ աշխատանքը եւ կանգուն պահեն ազգային կառոյցները: Հաստատուեցաւ, թէ հայ քաղաքական կուսակցութիւնները կը մնան պատնէշի վրայ, որպէսզի նորանոր ծրագիրներու շուրջ համախմբեն գաղութի զաւակները՝ ներառեալ անոնք որոնք հեռացած են հայկական շրջանակներէն: Ժողովականները որոշեցին շարունակել խորհրդակցութիւնները՝ յանուն լիբանանահայութեան բարօրութեան եւ վերականգնումին:
