«Միայն Աստուած կրնայ փրկել Լիբանանը, իսկ Աստուած ալ չի խառնուիր նման հարցերու»: Լիբանանի այսօրուան վիճակը այսպէս բնութագրեց Սոցիալ Դեմոկրատ Հնչակեան Կուսակցութեան Լիբանանի շրջանի Վարիչ Մարմինի ատենապետ Ընկ. Վանիկ Տագէսեան, Հայաստանի հանրային հեռատեսիլի ընկերութեան առաջին ալիքին (Հ1) տրուած հարցազրոյցի ընթացքին: Պատասխանելով լիբանանեան տեղական զարգացումներուն մասին հարցումի մը, Ընկ. Տագէսեան բացատրեց, որ ըլլալով յարանուանական հաւասարակշռութիւններու եւ համախոհութիւններու վրայ հիմնուած պետութիւն, Լիբանանի նախագահը պէտք է ըլլայ մարոնի քրիստոնեայ եւ ընտրուի խորհրդարանին կողմէ, սակայն այդ ենթակայ է ներքին համախոհութեան, նաեւ արեւելեան ու արեւմտեան ուժերու համաձայնութեան: «Սակայն այս տարի կայ նոր բարդոյթ մը՝ Մայիսին տեղի ունեցած ընտրութիւններուն ընտրուած անկախ երեսփոխաններու դրութիւնը, որովհետեւ այդ երեսփոխանները կողմնորոշուելու դժուարութիւն ունին», ըսաւ Վարիչ Մարմինի ատենապետը, բացատրելով թէ ինչու կարելի չէ եղած ընտրել երկրի նոր նախագահը: Ան ներկայացուց քաղաքական գլխաւոր երկու խմբաւորումներուն՝ «արեւմտամէտ» կամ «գերիշխանական» ուժերուն եւ «իրանամէտ, դիմադրութեան կողմնակիցներուն» տարակարծութիւններն ու թեկնածուները՝ մէկ կողմէ՝ Միշէլ Մուաուատ, միւս կողմէ՝ առճակատում Սլէյման Ֆրանժիէի եւ Ժըպրան Պասիլի միջեւ, ինչ որ կը խափանէ նախագահի ընտրութեան նիստերը: Դիտել տալով, որ Լիբանանի մէջ նախագահական աթոռի դատարկութեան առաջին պարագան չէ այս, Ընկ. Վանիկ Տագէսեան ծիծաղելի համարեց, որ պաշտօնակատար կառավարութիւնը իրաւունք չունի կայացնելու կարեւոր որոշումներ, այլ միայն կրնայ զբաղիլ ընթացիկ հարցերով: «Այս վիճակը կրնայ երկար շարունակուիլ եւ բնականաբար ծանր վիճակի մէջ գտնուող երկրին վիճակը աւելի կրնայ բարդանալ: Ես չեմ պատկերացներ այս երկրին նմանող այլ երկիր մը, ուր ղեկավարները օտար երկիրներու գործակալներ են, իսկ ժողովուրդը համակերպող եւ անհոգ», ցաւ յայտնելով ահազանգեց Ընկ. Վանիկ Տագէսեան:
ԸՆԿ. ՎԱՆԻԿ ՏԱԳԷՍԵԱՆ. «ԼԻԲԱՆԱՆԻ ՎԻՃԱԿԸ ԿՐՆԱՅ ԱՒԵԼԻ ԲԱՐԴԱՆԱԼ»
