Հանրօգուտ եւ ազգանուէր ՙԱրարատ՚ կը տօնէ իր 85-ամեակը: Սփիւռքահայ հայատառ մամուլի արժանաւոր ներկայացուցիչը իր մարտահրաւէրն է որ կը շարունակէ: Մարտահրաւէր կ՛ըսեմ, քանի որ ներկայ տիրող տնտեսական, ընկերային եւ քաղաքական պայմաններու տակ արեւմտահայերէնով օրաթերթ հրատարակել իսկապէս հերոսական արարք է:
Ո՞վ է ըսեր, թէ արեւմտահայերէնը հոգեվարք կ՛ապրի, ո՞վ է ըսեր, որ լիբանանահայ քաղաքական բարդ միջավայրի մէջ հայատառ մամուլը իր տեղը չունի£ Ապացոյց կ՛ուզէ՞ք, բացէք ամէն առաւօտ գունազարդ, գրեթէ անթերի տպագրական որակով լոյս տեսնող օրաթերթը, ստանալու համար տեղեկութիւններ` լիբանանեան ներկայ քաղաքական անցուդարձերէն, տեղեկանալու համար հայաստանեան վերջին լուրերուն, պատմական, աշխարհագրական թղթածրարներուն, մարզական ազգային թէ միջազգային հանդիպումներու ամենաթարմ արդիւնքներուն: Դեռ չէ՞ք բաւարարուած, ուրեմն կարդացէք մշակութային եւ գիտական յօդուածները: Ահաւասիկ օրաթերթ մը, որ բծախնդրօրէն եւ ամենայն հետեւողականութեամբ կը գոհացնէ բոլոր այն ազգակիցներն ու հայրենակիցները, որոնք դեռ կը խօսին, կը կարդան եւ կը հաղորդակցին հայերէն: ՙԱրարատ՚ բոլոր այս զանգուածին կողմէ իրեն վստահուած առաքելութեան ջահակիրն է:
Թէպէտ քիչ մը ծամծմուած է բանաձեւը` թէ ՙորպէս հայ ապրիլն ու գոյատեւելը՚ զոհողութիւն եւ ջանք կը պահանջէ ու կը պարտադրէ: Կ՛ուզէի աւելցնել նաեւ հաւատքը. հայը պէտք է որ հաւատայ իր ապագային, իր մշակութային ներուժին, նաեւ մարդկային արժէքներուն: Հապա հայատառ մամուլի նուիրեալ անձը՞. ան պարտի յաւելեալ ջանք, աշխատութիւն եւ մանաւանդ զոհողութիւն ի գործ դնել, իր սուրբ առաքելութիւնը շարունակելու համար£
ՙԱրարատ՚-ի խմբագրական կազմը վեր է ամէն գնահատանքէ, վերեւ յիշուած հրամայականները յաղթահարելու աննկուն ճիգերուն եւ մղուած յարատեւ պայքարին համար£ 85-ամեայ ՙԱրարատ՚-ի խմբագրական կազմին բարի երթ եւ անսահման համբերութիւն եւ յաջողութիւն կը մաղթենք:
ՍՈՒՐԷՆ ՇԷՐԻՔ
