ՙԱրարատ՚ օրաթերթի 85 տարիներու կեանքը կը յատկանշէ հասունութեան ժամանակաշրջան մը: Կեանքի փորձով իմաստնացած, ինչ-ինչ քաղաքական, տնտեսական եւ ընկերային յեղաշրջումներու բովէն անցած ու այսօրուան Լիբանանի ամենածանր իրավիճակին ամբողջ դառնութիւնը ճաշակած ՙԱրարատ՚-ը դեռ կը շարունակէ իր անխափան երթը:
Յուսահատութիւն եւ յուսալքում չճանչցող ՙԱրարատ՚-ի տնօրէնութիւնն ու խմբագրական կազմը բազմահազար ընթերցողներու դժուարին օրերը պայծառացնող, յուսադրող եւ առաջնորդող իր դերակատարութեամբ կը զօրացնէ անոնց կամքը` դիմադրելու ներկայ աշխարհաքաղաքական իրադրութեան պարտադրած բազմապիսի խոչընդոտներու դէմ:
Հայրենիքի այժմու անփառունակ իրավիճակին եւ թշնամիի անարգ յարձակումներուն դէմ ընդվզած հայութեան խռոված հոգիները զօրացնելու կը ծառայեն ՙԱրարատ՚-ի դրական մօտեցումով հրատարակուած լրատուութիւնը եւ յօդուածագրութիւնը:
Օրական դրութեամբ ընթերցողին հասնող նիւթերու ելեկտրոնային տարածումը հաւատք կը ներշնչէ գալիք պայծառ օրերու տեսիլքով:
Մեր մաղթանքն է, որ ՙԱրարատ՚ միեւնոյն կորովով եւ անկոտրում կամքով շարունակէ իր այս իրագործումներով լեցուն ճանապարհը մինչեւ 90-ամեակ եւ անկէ անդին:
ԱԶԱՏՈՒՀԻ ՍԻՄՈՆԵԱՆ