Իրանի նախագահ Իպրահիմ Ռայիսի Հայաստանի վարչապետ Նիկոլ Փաշինեանի Իրան այցելութիւնը համարեց կարեւոր քայլ մը երկու երկիրներուն միջեւ եղող յարաբերութիւնը բարձրացնելու համար նոր մակարդակի մը: Ըստ Ռայիսիի, Իրանի վարած բարիդրացութեան յարաբերութիւնը ռազմավարական նշանակութիւն ունի: Ան Հայաստանի հետ տնտեսական եւ անահովական հատուածներու զարգացումը համարեց կարեւոր քայլ:
Ռայիսի շեշտեց, որ Կովկասը կը կազմէ Իրանի պատմութեան եւ մշակոյթին մէկ մասը եւ երկիրը մեծ կարեւորութիւն կ’ընծայէ այս շրջանին: Շրջանի պատասխանատուները պէտք է լուծեն անհամաձայնութիւնները, առանց դիմելու օտարին, որուն միջամտութիւնը կ’աւելցնէ տագնապը:
Իր կարգին, վարչապետ Փաշինեան յայտարարեց, թէ Իրանի հետ պիտի ստորագրուի ուժանիւթի եւ բնական կազի առեւտուրի համաձայնագիրը: Ան աւելցուց, որ մեծ կարելիութիւններ կան երկու երկիրներուն միջեւ տնտեսական եւ քաղաքական յարաբերութեան զարգացումին համար:
