Լիբանանի Հանրապետութեան նախագահ Միշէլ Աունի պաշտօնավարութեան ժամանակաշրջանի աւարտէն ետք, Պաապտայի նախագահական պալատին մէջ առնուած են կարգ մը քայլեր: Նախագահին լուսանկարները վար առնուած են, փակուած են նախագահին գրասենեակը, կառավարութեան ժողովասենեակը, ժողովի սենեակները եւ ընդունման սրահը: Վար առնուած է լիբանանեան դրօշակը:
Միւս կողմէ, Լիբանանի վարչապետի պաշտօնակատար Նեժիպ Միքաթի յայտարարեց, թէ նախագահի բացակայութեան կառավարութեան կը փոխանցուին անոր լիազօրութիւնները եւ ոչ թէ վարչապետին անձնապէս: Ան խոստացաւ երկրին գործերը վարել առանց լարուածութեան: Նախագահի ընտրութիւնը կարեւոր է երկրին սահմանադրական կարգը պահելու համար: Միքաթի աւելցուց, որ կառավարութեան ժողովի հրաւէր պիտի չուղղէ բացի շատ բացառիկ պարագաներէ: Գործերը պիտի վարեն ցարդ որդեգրուած ձեւով:
