Հանրապետութեան նախագահի ընտրութեան յատկացուած խորհրդարանի երկրորդ նիստէն ընդամէնը երեք օր առաջ տակաւին վերջնական յայտնի չէ, եթէ երեսփոխանական խմբակցութիւնները պիտի մասնակցին նիստին` նախագահի ընտրութեան փորձ կատարելու համար: Յիշեցնելով« որ խորհրդարանը աւելի պառակտուած է, հետեւաբար համաձայնիլը աւելի բարդ է, ՙՈւժեղ Լիբանանը՚ խմբակցութեան անդամ երեսփոխան Ալէն Աուն զգուշացուց, թէ խորհրդակցութիւնները տակաւին բաւարար չեն բիւրեղացած, սակայն պնդեց, որ հաղորդակցութիւնները կարելի է շարունակել` համաձայնութեան յանգելու համար: ՙՄենք գլխաւոր մասնակից ենք որոշում կայացնելու եւ անոր զօրակցելու հոլովոյթին, ունինք շարք մը ատակ թեկնածուներ, հետեւաբար կը նախընտրենք ունենալ մեր սեփական թեկնածուն, այլապէս կ’որոնենք բարեկամ թեկնածու մը, ուստի կրնանք դիմել համաձայնական անձնաւորութեան մը՚, ըսաւ Աուն: Խօսելով բանակի հրամանատար զօրավար Ժոզէֆ Աունը նախագահ ընտրելու հաւանականութեան մասին, երեսփոխանը նշեց, որ եթէ ան պաշտօնապէս առաջադրուի, ապա խմբակցութիւնը ժողով գումարելով կը կայացնէ համապատասխան որոշումը:
Նոյն հարցով, մարոնիներու պատրիարք Պըշարա Ռահի կարտինալը կոչ ուղղեց զերծ մնալու քաղաքական գործարքներով ընտրուող նախագահներէ, աւելցնելով որ ՙժողովուրդը կը մերժէ ոմանց չափին համեմատ կառավարութեան մը կազմութիւնը՚:
Լիբանանեան ուժեր կուսակցութեան նախագահ Սամիր Ժաաժաա, իր կարգին, սխալ համարեց կառավարութեան կազմութեան ուղղութեամբ աշխատիլ այն ժամանակահատուածին, երբ բոլորը պէտք է կեդրոնանան նոր նախագահի ընտրութիւնը յաջողցնելու վրայ:
