Հանրապետութեան նախագահի մամլոյ գրասենեակը յայտարարեց, թէ նախագահ Միշէլ Աուն հեռաձայնային հաղորդակցութիւն մը ստացած է ծովային սահմանագծումի հարցով ամերիկացի միջնորդ Ամուս Հոքսթինէն` քննարկելու համար Իսրայէլի հետ անուղղակի հաղորդակցութիւններուն վերջին արդիւնքները: Միջնորդը հաստատած է, որ քննարկումներու այս փուլը եզրափակուած է, արձանագրուած են նկատողութիւնները եւ յառաջիկայ ժամերուն պիտի ուղարկուի համաձայնութեան առաջարկի վերջնական տարբերակը: Նախագահի գրասենեակին համաձայն, Լիբանան մանրակրկիտ պիտի ուսումնասիրէ վերջնական առաջարկը` համապատասխան որոշումները կայացնելու համար: Աուն խորհրդարանի փոխնախագահ Էլիաս Պու Սաապէն ծանօթացաւ Հոքսթինի հետ անցնող օրերուն կատարուած հաղորդակցութիւններուն բովանդակութեան:
Իսկ Ֆրանսայի Արտաքին գործերու նախարարութիւնը յայտարարեց, որ Փարիզ աշխուժօրէն կը համագործակցի ամերիկացիներուն հետ` յանգելու համար ծովային սահմանագղումի շուրջ վերջնական համաձայնութեան:
Սահմանագծումի համաձայնութեան առաջարկին հիման վրայ Իսրայէլին տրուող Քարիշ կազահորը շահագործող ՙԷնըրճին՚ ընկերութիւնը երէկ յայտարարեց, որ արտահանումի ծովային հարթակը խողովակաշարով միացուցած է ցամաքին եւ սկսած է կատարել կազահանումի անհրաժեշտ փորձարկումները: Իսրայէլեան լրատուամիջոցներ երէկ նաեւ հաղորդեցին« որ համացանցահէններ յաջողած են կոտրել ընկերութեան համացանցային կապը եւ խափանել կազ արտահանելու փորձը: Իսրայէլ նախապէս միջնորդին միջոցաւ Լիբանանին տեղեկացուցած էր, որ տակաւին չէ սկսած կազ արտահանել, այլ պարզապէս փորձ կը կատարէ:
Իսրայէլի պաշտպանութեան նախարար Պենի Կանց լաւ որակեց Լիբանանի հետ ծովային սահմանագծումի համաձայնութեան առաջարկը, մաղթելով որ այդ շուտով կը վաւերացուի: Ան սակայն յիշեցուց, որ ՙգնդակը այժմ կը գտնուի լիբանանցիներուն մօտ՚:
