Երկուշաբթի, 3 Հոկտեմբեր 2022-ի երեկոյեան, Պիքֆայայի Սուրբ Աստուածածին վանքի վեհարանէն ներս, ՆՍ.Օ.Տ.Տ. Արամ Ա. Վեհափառ Հայրապետը ընդունեց Կաթողիկոսարանի ՙՇնորհալի՚ երգչախումբի նորընտիր վարչութիւնը, գլխաւորութեամբ երգչախումբի խմբավար Հոգշ. Տ. Զաւէն Վրդ. Նաճարեանի:
Յանուն երգչախումբին, հայր սուրբը որդիական երախտագիտութիւն յայտնեց Վեհափառ Հայրապետին, երգչախումբի գործունէութեան նկատմամբ իր ցուցաբերած հայրական հոգածութեան ու զօրակցութեան համար: Այս առիթով, խմբավար հայր սուրբը Նորին Ս. Օծութեան պարզեց երգչախումբին յառաջիկայ ծրագիրները եւ այս ծիրէն ներս ընդգծեց Ս. Ներսէս Շնորհալի Հայրապետին վախճանման 850-ամեակին նուիրուած յատուկ համերգը, որ պիտի կայանայ Անթիլիասի Մայրավանքին մէջ: Հայր սուրբը նաեւ յիշեց, որ յառաջիկայ տարի երգչախումբին հաստատման 50-ամեակն է եւ պարզեց այս առիթով կատարուելիք կարգ մը նախաձեռնութիւններ:
Վեհափառ Հայրապետը իր ջերմ գնահատանքը յայտնեց խմբավար հայր սուրբին, վարչութեան, ինչպէս նաեւ երգչախումբի բոլոր անդամներուն, որոնք յատկապէս Լիբանանի ընկերային-տնտեսական դժուար պայմաններուն մէջ կը շարունակեն իրենց գործօն մասնակցութիւնը բերել երգչախումբի ծրագիրներու իրագործման: Նորին Ս. Օծութիւնը նաեւ ընդգծեց մեր հոգեւոր ու մշակութային երաժշտական արժէքները տարածելու կոչուած երգչախումբին առաքելութեան կարեւորութիւնը:
