Ռուսիոյ Արտաքին գործերու նախարարութիւնը Միացեալ Նահանգներու նախագահ Ճօ Պայտընին հարց տուաւ, թէ արդեօք Ուաշինկթըն գործադրութեան դրա՞ծ էր ՙՆորտ Սթրիմ՚ (Հիւսիսային հոսք) ծրագրին վերջ տալու իր սպառնալիքը: Նշենք, որ ուժանիւթային նշեալ ծրագրի խողովակաշարերը բնական կազ կը փոխադրեն Ռուսիայէն Գերմանիա: Ծրագրի առաջին եւ երկրորդ ստորջրեայ խողովակաշարերէն նախանցեալ օր տեղի ունեցաւ արտահոսք: Շուէտի եւ Դանիոյ իշխանութիւնները կը նշեն, որ արտահոսքին նախորդած են ստորջրեայ պայթումներ, որոնք վնասած են խողովակաշարը:
Եւրոմիութիւնը մտահոգութիւն յայտնեց խողովակաշարին կրած վնասին մասին եւ պնդեց, որ տեղի ունեցածը դիտումնաւոր էր, նպատակ ունենալով քաոսի մատնել ուժանիւթային մատակարարումները:
Ռուսիոյ նախագահութեան բանբեր Տմիթրի Փեսքով իր կարգին անհիմն որակեց ՙՆորտ Սթրիմ՚-ի հարցով Մոսկուային ուղղուած ամբաստանութիւնները: Ան Շուէտի եւ Դանիոյ իշխանութիւններէն պահանջեց արկածին մասին յաւելեալ մանրամասնութիւններ: Փեսքով նաեւ շեշտեց, որ ռուսերը պէտք է շարունակեն գործողութիւնները Ուքրանիոյ մէջ` ամբողջութեամբ տիրապետելու համար արեւելեան Տոնպաս գաւառին:
Նոյն ծիրին մէջ, Ուքրանիոյ արեւելեան եւ հարաւային ռուսամէտ գաւառներուն մէջ պաշտօնապէս յայտարարուեցաւ Ռուսիոյ միանալու հանրաքուէին յաջողութիւնը: Ուքրանիայէն անջատուելու ընտրանքին իր հաւանութիւնը տուած է բնակչութեան 87,05 տոկոսը Խերսոնի մէջ, 93,11 առ հարիւրը` Զափորիժիոյ, 98,54 տոկոսըª Լուկանսկի եւ 99,23 առ հարիւրը` Տոնեցքի մէջ: Այժմ կ’ակնկալուի, որ Մոսկուայի իշխանութիւնները պաշտօնապէս որոշում հրապարակեն նշեալ 4 շրջանները Ռուսիոյ կցելու մասին:
Ռուսիոյ մէջ ամերիկեան դեսպանութիւնը երկրին մէջ գտնուող ամերիկացիներուն խորհուրդ տուաւ անյապաղ հեռանալ, ահազանգելով, որ անոնք ենթակայ են ձերբակալութեան, եթէ մասնակցին բողոքի շարժումներուն:
Ամերիկեան դեսպանութիւնը նախապէս նշած էր, որ Ռուսիոյ իշխանութիւնները ձերբակալած են բողոքի շարժումներուն մասնակցող երկու ամերիկացի:
