Ֆրանսայի պաշտպանութեան նախարար Սեպասթիէն Լըքորնիու Փարիզի մէջ ընդունեց իր հայ պաշտօնակից Սուրէն Պապիկեանը: Վերջինս ֆրանսական խնդրանքով ներկայացուց 13 Սեպտեմբերի ատրպէյճանական սահմանային յարձակումին հետեւանքով յառաջացած իրավիճակը: Ֆրանսացի նախարարը վերահաստատեց խնդիրին առնչութեամբ Ֆրանսայի պետական դիրքորոշումը, ըստ որուն` ատրպէյճանական ուժերը պէտք է անյապաղ դուրս գան Հայաստանի Հանրապետութեան տարածքէն: Ֆրանսայի պաշտպանութեան նախարարը յայտնեց, որ իրենք դիտորդներու պատուիրակութիւն պիտի ուղարկեն Հայաստան` իրավիճակը գնահատելու համար:
Իսկ Հայաստանի վարչապետ Նիկոլ Փաշինեան ընդունեց Ֆրանսայի ծերակոյտի Ֆրանսա-Հայաստան բարեկամական խումբի պատուիրակութիւնը: Յիշեցնելով, որ 26 Սեպտեմբերին կը գտնուէր Փարիզ, Փաշինեան մաղթեց, որ փոխադարձ այցելութիւնները կը սատարեն երկկողմանի յարաբերութիւններու ամրապնդումին: Վարչապետը շեշտեց Ֆրանսայի առանցքային դերը` Հայաստանի նկատմամբ Պաքուի գործադրած բռնութիւններու հետեւանքները յաղթահարելու ուղղութեամբ: Ան կարեւորեց միջազգային դիտորդական առաքելութեան գործուղումը սահմանային վնասուած գօտի, որպէսզի միջազգային ընտանիքը ստանայ ուղիղ տեղեկութիւններ: Ֆրանսացի ծերակուտականները տեսակցեցան նաեւ արտաքին գործերու նախարար Արարատ Միրզոյեանի հետ:
