Կ’ակնկալուի, որ այսօր տեղի ունենայ հանրապետութեան նոր նախագահի ընտրութեան առաջին նիստը, սակայն խիստ բացառուած է, որ նիստի աւարտին իրապէս ընտրուի երկրի նոր նախագահը: Հետեւաբար կը կարծուի, թէ այսօրուան նիստը պարզապէս պիտի ըլլայ խորհրդարանական խմբակցութիւններու դիրքորոշումներն ու միտումները բացայայտելու, երեսփոխանական ընդհանուր մթնոլորտը ստուգելու նիստ: Այս ծիրէն ներս, խորհրդարանական խմբակցութիւններուն մեծամասնութիւնը երէկ պատրաստակամութիւն յայտնեցին մասնակցելու այսօրուան նիստին: ՙՈւժեղ Լիբանանը՚ համախմբումի նախագահ երեսփոխան Ժըպրան Պասիլ յստկացուց, որ իրենք սպիտակ քուէով պիտի մասնակցին ընտրութեան: Պասիլ բուռն յարձակում գործեց Դատական գերագոյն խորհուրդի նախագահ Սուհէյլ Ապպուտի վրայ եւ զայն ամբաստանեց նաւահանգիստի պայթումին հարցով հետաքննիչի փոխանորդի նշանակումը խափանելու մէջ: Պասիլ նաեւ դատապարտեց իր համախմբումի անդամներէն երեսփոխան Շարպէլ Մարունի դատական հետապնդումը` դատաւոր Ապպուտը անարգելուն համար: Պասիլ յիշեցուց, թէ բոլոր երեսփոխանները կը վայելեն անձեռնմխելիութիւն, հետեւաբար ենթակայ չեն դատական հետապնդումի:
