Հայաստանի արտաքին գործերու նախարար Արարատ Միրզոյեան յայտարարեց, որ Հաւաքական անվտանգութեան պայմանագրի կազմակերպութեան (ՀԱՊԿ) դիտորդական առաքելութիւնը Հայաստան պիտի ժամանէ 15 Սեպտեմբերին:
ՙՄենք կը կարծենք, որ այդ առաքելութիւնը պիտի ժամանէ արդէն վաղը… Մեր դիմումը պատշաճ կարգով քննարկուած է ՀԱՊԿ խորհուրդին մէջ, որոշուած է ուղարկել դիտորդական առաքելութիւն, եւ մենք յոյսով ենք, որ առաքելութիւնը վաղը արդէն կը ժամանէ՚, այս մասին Միրզոյեան ըսաւ Ազգային Ժողովի հարց ու պատասխանին ժամանակ:
Արտաքին գործերու ղեկավարը գոհունակութեամբ փաստեց, որ Հայաստանի դէմ Ատրպէյճանի սանձազերծած այս յարձակումը մեծամասամբ խիստ հասցէական դատապարտման արժանացած է միջազգային հանրութեան կողմէ: ՙԱնշուշտ, շարք մը երկիրներու եւ կազմակերպութիւններու պարագային [յայտարարութիւնները] ոչ այնքան հասցէական էին եւ ուղիղ արձանագրող, որքան մենք կը ցանկանայինք, բայց աշխատանքները տարուած են եւ հիմա ալ պիտի շարունակուին՚, յաւելեց ան:
