Եւրոխորհրդարանին մէջ Հարաւային Կովկասի հետ յարաբերութիւններու հարցերով պատուիրակութեան ղեկավար, պատգամաւոր Մարինա Քալիւրանտ յայտարարութիւն տարածած է Հայաստանի Հանրապետութեան դէմ Ատրպէյճանի ռազմական յարձակումներու փաստին առնչութեամբ:
ՙԵս խստօրէն կը դատապարտեմ Ատրպէյճանի կողմէ նախորդ գիշերուան լայնածաւալ ռազմական յարձակումը Հայաստանի Հանրապետութեան տարածքին գտնուող բազմաթիւ թիրախներու դէմ: Տեղեկութիւններ կան բուռն հրետակոծութիւններու եւ անօդաչու թռչող սարքերով յարձակումներու մասին, որոնք թիրախաւորած են Սիւնիքի, Վայոց Ձորի, Գեղարքունիքի հայկական բնակավայրերը` պատճառ դառնալով տակաւին անյայտ թիւով զոհերու՚, նշած է Քալիւրանտ` ընդգծելով, որ այս նոր յարձակումը շարունակութիւնն է Մարտին եւ Օգոստոսին Պաքուի կողմէ Լեռնային Ղարաբաղի շփման գիծին զինադադարի կոպիտ խախտումներու, որոնց ժամանակ ատրպէյճանական կողմը օգտուած էր ռուս-ուքրանական հակամարտութեամբ պայմանաւորուած համաշխարհային եւ տարածաշրջանային իրադրութենէն:
ՙԿոչ կ՛ընեմ միջազգային հանրութեան ու մասնաւորապէս Եւրոմիութեան յստակօրէն պատասխանելու այս անընդունելի ուժի կիրառման: Սա ՙերկու կողմերուն՚ զսպուածութեան կոչեր յղելու ՙանատամ՚ յայտարարութիւններուն ժամանակը չէ: Ընդամէնը երկու շաբաթ առաջ էր, որ Ատրպէյճանն ու Հայաստանը Պրիւքսէլի մէջ համաձայնութեան եկան` մէկ ամսուայ ընթացքին սկսելու աշխատիլ խաղաղութեան համաձայնագրի բնագրին վրայ: Կոչ կ՛ընեմ Պաքուինª չվատնելու այս պատմական հնարաւորութիւնը եւ առանց յապաղման վերադառնալու բանակցային սեղան՚, յայտարարած է Քալիւրանտ:
