Վարչապետ Նիկոլ Փաշինեան ընդունած է Համաշխարհային դրամատան Եւրոպայի եւ Կեդրոնական Ասիոյ տարածաշրջանի փոխնախագահ Աննա Պիերտենն ու անոր գլխաւորած պատուիրակութիւնը:
Փաշինեան կարեւորած է Հայաստասնի եւ Համաշխարհային դրամատան գործընկերութիւնը, որուն 30-ամեակը կը լրանայ այս տարի Սեպտեմբերին, եւ որու ծիրին մէջ մեր երկրին մէջ կ՛իրագործուին տնտեսութեան զարգացման ուղղուած ծրագիրներ` թէ՛ պետական, թէ՛ սեփական հատուածներուն մէջ: Նիկոլ Փաշինեան նշած է, որ ՀՀ կառավարութեան ծրագրի առաջնահերթութիւններու շարքին են կրթութեան, ենթակառուցուածքներու, կառավարման, թուայնացման ոլորտներու բարեփոխումները, եւ անոնց յաջող իրականացման գործին մէջ Համաշխարհային դրամատունը Հայաստանի կարեւոր գործընկերներէն է:
Համաշխարհային դրամատան փոխնախագահը շնորհակալութիւն յայտնած է ՀՀ վարչապետին բարձր գնահատականին համար եւ շնորհաւորած է փոխշահաւէտ գործընկերութեան 30-ամեակին առթիւ: Աննա Պիերտեն անդրադարձած է համատեղ ծրագիրներուն` արդիւնաւէտ գնահատելով անոնց ընթացքը եւ մեր երկրի տնտեսական յառաջընթացին բերած նպաստը: Ան նշած է, որ Համաշխարհային դրամատունը պատրաստակամ է շարունակելու օժանդակութիւնը ՀՀ կառավարութեան` գործունէութեան ծրագրով նախանշուած առաջնահերթութիւնները կեանքի կոչելու ուղղութեամբ:
Զրուցակիցները գոհունակութիւն յայտնած են երկկողմ գործընկերութեան շրջանակին մէջ առ այսօր կատարուած աշխատանքներէն եւ միտքեր փոխանակած են անոր զարգացման հեռանկարներուն շուրջ: Երկուստեք կարեւորուած է կրթութեան, ենթակառուցուածքներու, դատաիրաւական, թուայնացման, առողջապահութեան, հանրային կառավարման եւ այլ ուղղութիւններով փոխգործակցութիւնը: Նշուած է հաստատութենական կարողութիւններու հզօրացման եւ մարդկային դրամագլուխի զարգացման ծրագիրներուն անհրաժեշտութիւնը:
Նիկոլ Փաշինեան ընդգծած է կրթութեան ոլորտի բարեփոխման առաջնահերթութիւնը, քանի որ մարդկային դրամագլուխը կարեւորագոյն աղբիւրն է, եւ կրթութիւնն է որեւէ բարեկարգման յաջողութեան հիմքը: Վարչապետին խօսքով` այս տեսլականը դրուած է կառավարութեան ծրագրի հիմքին, որու իրականացման ուղղութեամբ ալ գործադիրը հետեւողականօրէն յառաջ կը շարժի: Բարեկարգումները յաջողելու ծիրին մէջ, կառավարութեան ղեկավարը կարեւորած է նաեւ հաստատութենական կարողութիւններու հզօրացման միտուած ծրագիրները` դատական ոլորտէն մինչեւ հանրային կառավարում:
Վարչապետ Փաշինեան երախտագիտութիւն յայտնած է Համաշխարհային դրամատան, դրամատան հայաստանեան գրասենեակին արդիւնաւէտ գործընկերութեան համար եւ վերահաստատած է կառավարութեան պատրաստակամութիւնը` զարգացնելու եւ հարստացնելու զայն փոխադարձ հետաքրքրութիւն ներկայացնող նախաձեռնութիւններով:
