Չեխիոյ մայրաքաղաք Փրակի մէջ 20-28 Օգոստոսին ՙԹանգարաններու ուժը՚ խորագրի ներքոյ տեղի ունեցած է Թանգարաններու միջազգային խորհուրդի (ԻԿՕՄ) 26-րդ վեհաժողովը, որուն մասնակցած է նաեւ Հայաստանի պատուիրակութիւնը:
Ինչպէս կը տեղեկացնէ Կրթութեան, գիտութեան, մշակոյթի եւ մարմնակրթութեան նախարարութեան տարածած հաղորդագրութիւնը, գերատեսչութեան փոխնախարար Ալֆրետ Քոչարեան ընդունած է Հայաստանի պատուիրակութեան անդամները` քննարկելու վեհաժողովին արդիւնքները եւ ձեռք բերուած համագործակցութեան հեռանկարները: Փոխնախարարը ողջունած է պատուիրակութեան անդամները` կարեւորելով նմանօրինակ միջազգային հարթակին Հայաստանի մասնակցութիւնը:
Հայաստանի պատուիրակութեան կազմին մէջ ընդգրկուած էին ՀՀ ԿԳՄՄ նախարարութեան եւ Երեւանի քաղաքապետարանի ենթակայութեամբ գործող թանգարաններու 18 ներկայացուցիչներ (Հայաստանի պատմութեան թանգարան, Հայաստանի ազգային պատկերասրահ, Եղիշէ Չարենցի անուան գրականութեան եւ արուեստի թանգարան, Կոմիտասի թանգարան-հիմնարկ, Ռուսական արուեստի թանգարան, Արամ Խաչատրեանի տուն-թանգարան, Մատենադարան, Երեւանի պատմութեան թանգարան, Ժամանակակից արուեստի թանգարան):
Պատուիրակութեան անդամներուն տեղեկացմամբ` քննարկուած են առնուազն 4 միջազգային կոմիտէներու տարեկան վեհաժողովները Հայաստանի մէջ հիւրընկալելու հեռանկարները: Անոնք են` գրական եւ երաժշտահաններու թանգարաններու, ցուցադրութիւններու փոխանակման, երաժշտական գործիքներու եւ երաժշտական թանգարաններու, ինչպէս նաեւ անձնակազմի վերապատրաստման միջազգային կոմիտէները:
Քննարկուած է նաեւ 2028 թուականին վեհաժողովը Հայաստանի մէջ կայացնելու հնարաւորութիւնը` ակնկալելով պետութեան հովանաւորութիւնն ու աջակցութիւնը: Նախարարի տեղակալ Ալֆրետ Քոչարեան ըսած է, որ պետութիւնը կ՛ընէ ամէն ինչ` ոլորտի աշխուժութիւնը բարձրացնելու, աշխատողները խրախուսելու, ինչպէս նաեւ հնարաւոր ուղիներով բարձր ֆինանսաւորում ապահովելու նպատակով:
Վեհաժողովի հայաստանեան ներկայացուցիչները տեղեկացուցած են, որ ԻԿՕՄ-ի վտանգներու կառավարման եւ ռազմական թանգարաններու միջազգային կոմիտէներու կազմակերպած համատեղ նիստին ԻԿՕՄ Ատրպէյճանի նախագահը ներկայացուցած է հակահայ զեկոյց, ինչին ի պատասխան` ԻԿՕՄ Հայաստանի նախագահ Հայկ Մկրտչեանը կազմակերպիչ կոմիտէներուն յանձնած է Հայաստանի պատուիրակներու պատրաստած եւ ՀՀ Արտաքին գործերու նախարարութեան հետ համաձայնեցուցած բողոք-նամակը` ընդգծելով, որ արհեստավարժ հարթակը պէտք չէ վերածուի քաղաքականի: Ներկայացուած է նաեւ Արցախի մէջ ատրպէյճանական զինուած ուժերու կողմէ իրականացուած պատերազմական յանցագործութիւններու` մշակութային ժառանգութեան ոչնչացման վերաբերեալ զեկոյցը:
ԻԿՕՄ-ի վեհաժողովները տեղի կ՛ունենան իւրաքանչիւր երեք տարին մէկ եւ կը համարուին թանգարանային ոլորտի ամենակարեւոր մասնագիտական իրադարձութիւնը: Գլխաւոր համաժողովները փորձի փոխանակման, ոլորտի նորարար գաղափարներն ու հեռանկարները քննարկելու, ինչպէս նաեւ նոր կապերու հաստատման համար եզակի հնարաւորութիւն են: Վեհաժողովին մասնակցած են 115 երկիրներու թանգարանային ոլորտի շուրջ 3000 ներկայացուցիչներ:
Այս առումով վեհաժողովի հայաստանեան ներկայացուցիչները այցը գնահատած են դրական. ձեռք բերուած են շարք մը պայմանաւորուածութիւններ:
Վեհաժողովի ընթացքին ԻԿՕՄ-ի կողմէ հաստատուած է ՙթանգարան՚ եզրոյթի նոր սահմանումը, որու օգտին քուէարկած են նաեւ հայ պատուիրակները:
