Արցախի Հանրապետութեան անկախութեան հռչակման 31-րդ տարեդարձին առիթով նախագահ Արայիկ Յարութիւնեան ուղերձ յղած է Արցախի բնակչութեան: Ան 2 Սեպտեմբեր 1991-ը համարեց պատմական թուական: Ժողովրդական պատգամաւորներու ԼՂԻՄ մարզային եւ Շահումեանի շրջանային խորհուրդներու միացեալ նստաշրջանը ընդունեց Արցախի Հանրապետութեան անկախութեան հռչակագիրը:
Սակայն գերիշխան պետութիւն հիմնելու ճամբան լեցուն էր արգելքներով: Այդ փորձութեան ամենամեծն էր 2020-ի 44-օրեայ պատերազմը, որ պատճառեց հազարաւոր նահատակներ մեր ժողովուրդի զաւակներէն: Մենք երախտապարտ ենք այդ նահատակներուն հայ ժողովուրդի արժանապատիւ գոյութեան համար:
Արցախ-Հայաստան կապը կ’ապահովուի նոր ճանապարհին միջոցով: Անոր ապահովութիւնը վստահուած է նաեւ ռուս խաղաղապահ ուժերուն: Յարութիւնեան շնորհակալութիւն յայտնեց Հայաստանի եւ Սփիւռքի հայորդիներու նեցուկին համար, նաեւ ռուս խաղաղապահ ուժերուն, իրենց կատարած խաղաղութեան պահպանումի գործին համար: Շնորհակալութիւն յայտնեց նաեւ բոլոր կառոյցներուն, որոնք նեցուկ կը կանգնին Արցախի մարդասիրական, արդարութեան եւ ժողովրդավարութեան արժէքները վառ պահելուն համար:
Յարութիւնեան աւելցուց, որ Արցախի ժողովուրդը վճռական եւ հաստատակամ է իր կայացուցած
որոշումին մէջ ու երթը պիտի շարունակէ:
