Ուսումնական տարուայ մեկնարկին ընդառաջ` 31 Օգոստոսին, կայացած է Հայաստանի ֆիզիքական մշակոյթի եւ մարմնակրթութեան պետական հիմնարկի (ՀՖՄՄՊՀ)` ՙՍփորթուս՚ յենակետային քոլեճի բացման հանդիսաւոր արարողութիւնը:
Միջոցառման մասնակցած են ՀՀ կրթութեան, գիտութեան, մշակոյթի եւ մարմնակրթութեան նախարարի տեղակալ Կարէն Գիլոյեանը, ՀՖՄՄՊՀ տնօրէն Դաւիթ Խիթարեանը, քոլեճի տնօրէն Նելլի Սարգսեանը, հիմնարկի փրոֆէսորադասախօսական անձնակազմը, ուսանողներ, ծնողներ:
Քոլեճին մէջ կրթութիւնը պիտի իրականացուի է չորս մասնագիտութիւններով` ՙՖիզիքական մշակոյթ եւ մարմնակրթութիւն՚, ՙԲուժական մերսում՚, ՙԶբօսաշրջութիւն եւ թիկնապահական գործ՚: ՙՍփորթուս՚ յենակետային քոլեճը պիտի ունենայ շուրջ 95 սան:
ԿԳՄՄ նախարարի տեղակալ Կարէն Գիլոյեանը, որ նաեւ ՀՖՄՄՊՀ Հոգաբարձուներու խորհուրդի նախագահն է, ողջունելով ներկաները` բարի երթ մաղթած է քոլեճի առաջին սաներուն.
ՙՀայկական մարզական կրթութեան ասպարէզին մէջ այսօր իսկապէս հետաքրքրական նորութիւն տեղի կ՛ունենայ: Ասոր պահանջը իսկապէս կար. միջին մասնագիտական կրթութիւնը շատ կարեւոր օղակ է Հայաստանի եւ առհասարակ աշխարհին մէջ: Շատ կը փափաքիմ, որ այս քոլեճը համարուի լաւագոյն միջին մասնագիտական կրթօճախներէն մէկը: Վստահ եմ, որ դիմորդները պիտի ստանան լաւ կրթութիւն եւ անոնցմէ շատերը հետագային արդէն իրենց ուսումը պիտի շարունակեն Հայաստանի ֆիզիքական մշակոյթի եւ մարմնակրթութեան պետական հիմնարկին մէջ՚:
ՀՖՄՄՊՀ տնօրէն Դաւիթ Խիթարեան նշած է, որ այսօր նշանակալից օր է ոչ միայն քոլեճի սաներուն, այլեւ Հայաստանի ֆիզիքական մշակոյթի եւ մարմնակրթութեան պետական հիմնարկին համար:
ՙԲարձրագոյն ուսումնական հաստատութեան 77-ամեայ կենսագրութեան մէջ յենակետային քոլեճի բացումը նոր գիծ պիտի հաղորդէ հիմնարկին, նոր կրթական միջավայր պիտի ձեւաւորէ ուսանողութեան շրջանին մէջ՚, ըսած է Դաւիթ Խիթարեանը ու վստահութիւն յայտնած, որ ՀՖՄՄՊՀ քոլեճի տնօրէնութիւնն ու փրոֆէսորադասախօսական անձնակազմը պիտի ընեն ամէն հնարաւորը, որպէսզի քոլեճի սաները ուսումնառութեան ընթացքին ստանան բաւարար գիտելիք, ինչպէս նաեւ կատարելագործեն իրենց մասնագիտական կարողութիւնները:
ՀՖՄՄՊՀ յենակետային քոլեճը իր առաջին սաները կ՛ընդունի վերակառուցուած եւ վերանորոգուած մասնաշէնքի մէջ: Դաւիթ Խիթարեանի խօսքով` մասնաշէնքին այդ մասը հիմնարկի ամենաանմխիթար հատուածն էր, բայց այժմ ամբողջութեամբ վերանորոգուած է, շուտով պիտի աւարտի նաեւ կահաւորման գործընթացը: Տնօրէնին գնահատմամբ` ուսումնառութեան համար բարեկարգ պայմաններն ու ժամանակից կահաւորումը անպայմանօրէն պիտի նպաստեն սաներու արդիւնաւէտ կրթութեան ապահովման:
Քոլեճի առաջին սաները ողջունած եւ յաջող ուսումնական տարի մաղթած է նաեւ տնօրէն Նելլի Սարգսեանը:
ՙՍփորթուս՚ յենակետային քոլեճի առաջին սաներու կազմին մէջ են տարբեր մարզաձեւերու Հայաստանի հաւաքականներու 9 անդամներ, այդ շարքին` Եւրոպայի մարմնամարզութեան երիտասարդներու 2022 թուականի առաջնութեան կրկնակի փոխախոյեան Համլէտ Մանուկեանը: Միջոցառման ընթացքին քոլեճի տնօրէն Նելլի Սարգսեանը 15-ամեայ Համլէտ Մանուկեանին յանձնած է պատուոգիր` Հայաստանի Հանրապետութեան մարզական պատիւը բարձր պահելու համար:
ԿԳՄՄ նախարարի տեղակալ Կարէն Գիլոյեանը տնօրէն Դաւիթ Խիթարեանի եւ Նելլի Սարգսեանի ուղեկցութեամբ ծանօթացած է քոլեճի ենթակառուցուածքային պայմաններուն, եղած է դասասենեակներուն եւ ընթերցասրահին մէջ:
