Սոյն թուականի 31 Օգոստոսէն 8 Սեպտեմբեր Գերմանիոյ Դաշնութեան Գառլսռուէ քաղաքին մէջ տեղի կ’ունենայ Եկեղեցիներու համաշխարհային խորհուրդի 11-րդ գագաթաժողովը` ՙՔրիստոսի սէրը կ՛առաջնորդէ աշխարհը՚ խորագրով:
Եօթը տարին մէկ գումարուող գագաթաժողովը համավարակի սահմանափակումներէն յետոյ միատեղած է աշխարհի տարբեր ծագերէ քրիստոնէական աւելի քան 300 եկեղեցիներու ներկայացուցիչներ:
Ն.Ս.Օ.Տ.Տ. Գարեգին Բ. Ամենայն Հայոց կաթողիկոսին օրհնութեամբ ու տնօրինութեամբ գագաթաժողովին իր մասնակցութիւնը պիտի բերէ Մայր Աթոռ Սուրբ Էջմիածնի պաշտօնական պատուիրակութիւնը հետեւեալ կազմով` գերաշնորհ Տ. Վիգէն արքեպիսկոպոս Այքազեան (ԱՄՆ Հայոց Արեւելեան թեմ), գերաշնորհ Տ. Արմաշ եպիսկոպոս Նալպանտեան (Դամասկոսի Հայոց թեմի առաջնորդ), գերաշնորհ Տ. Յովակիմ եպիսկոպոս Մանուկեան (Բրիտանիոյ եւ Հիւսիսային Իրլանտայի Հայոց թեմի առաջնորդ), գերաշնորհ Տ. Գէորգ եպիսկոպոս Սարոյեան (Մասեացոտնի թեմի առաջնորդ), գերաշնորհ Տ. Սերովբէ եպիսկոպոս Իսախանեան (Գերմանիոյ Հայոց թեմի առաջնորդ), հոգեշնորհ Տ. Գարեգին վարդապետ Համբարձումեան (Մայր Աթոռ Սուրբ Էջմիածնի քարոզչական կեդրոնի տնօրէն), բարեշնորհ Սահակ սարկաւագ Սուքիասեան (Ֆրանսայի Հայոց թեմ), երէցկին Արփի Քուզույեան (ԱՄՆ Հայոց Արեւելեան թեմ), դր. Տիաննա Ծաղիկեան (Մայր Աթոռ Սուրբ Էջմիածին), Տիկ. Էրիքա Արաեւնա (Նոր Նախիջեւանի եւ Ռուսաստանի Հայոց թեմ), Տիկ. Մանիա Քէշիշեան (Գանատայի Հայոց թեմ):
Մայր Աթոռի պատուիրակները նաեւ իրենց գործուն մասնակցութիւնը կը բերեն ԵՀԽ անցնող աշխատանքներու ամփոփման ու գալիք ծրագիրներու պատրաստութեան:
