Երէկ Պելճիքայի մայրաքաղաք Պրիւքսէլի մէջ գումարուեցաւ եռակողմ ժողով` Հայաստանի վարչապետ Նիկոլ Փաշինեանի, Ատրպէյճանի նախագահ Իլհամ Ալիեւի եւ Եւրոպական խորհուրդի նախագահ Շարլ Միշէլի միջեւ: Հանդիպումը տեւեց չորս ժամ: Ժողովին արդիւնքներուն շուրջ խօսած է Եւրոպական խորհուրդի նախագահը: Ան յայտարարած է, որ Հարաւային Կովասի մէջ արձանագրուած վերջին զարգացումները եւ երկու կողմերուն հետ Եւրոպական խորհուրդին յարաբերութիւնը եղած են օրակարգի նիւթերը: Միշէլ յայտարարած է, որ շատ մը դրական քայլեր առնուած են իրենց վերջին ժողովէն ետք: Երկու կողմերը համաձայնած են խաղաղութեան համաձայնագիր ստորագրելու պայմաններու քննարկումը սկսիլ եւ մէկ ամիսէն պատրաստել առաջին տարբերակը:
Միշէլ աւելցուցած է, որ խօսուած է նաեւ մարդասիրական հարցերու շուրջ` ականազերծում, գերիներու ազատ արձակում եւ կորսուածներու ճակատագիրի յստակացում: Ան Ատրպէյճանէն պահանջած է փակել հայ գերիներու թղթածրարը:
Սահմանագծումի հարցով ալ հանդիպման մասնակիցները խօսած են մանրամասնութիւններու մասին եւ որոշուած է սահմանագծումի յանձնախումբի յաջորդ ժողովը կայացնել Պրիւքսէլի մէջ: Օրակարգի նիւթ դարձած է նաեւ ճանապարհներու ապաշրջափակումը եւ քաղաքացիները խաղաղութեան պատրաստելու հոլովոյթին կարեւորութիւնը: Եւրոպական խորհուրդը խոստացած է ջանք չխմայել կայուն խաղաղութեան եւ տնտեսական զարգացումի հասնելու Հարաւային Կովկասի շրջանին մէջ:
