Կիւմրիի Շիրազի 22 հասցէով բացումը կատարուեցաւ ՙԿինոտուն՚ խորագրով նոր թանգարանային ցուցադրութեան:
Թանգարանային այս նախագիծը իրականացուած է շատերուն յայտնի ալեքսանդրապոլեան շինութիւններէն մէկուն բակին մէջ, ուր նկարահանուած են ՙՄեր Մանկութեան Թանկօն՚, ՙՀեղնար Աղբիւր՚, ՙՈւրախ Աւտոբուս՚ եւ միւս ֆիլմերը:
Թանգարանային ցուցադրութիւնը կը ներկայացնէ հայկական արտադրութեան ֆիլմերու ցուցապաստառներ, ֆիլմերու ստեղծման աշխատանքային դրուագներ ներկայացնող եզակի լուսանկարներ, ինչպէս նաեւ իրեր, որոնք օգտագործուած են նկարահանումներու ընթացքին: Բաղկացուցիչ մաս պիտի կազմէ նաեւ ֆիլմի երաժշտաութիւնը: ՙԱյս վայրին մէջ պատմական յիշողութիւններ կան` սիրուած վայր եղած է բեմադրիչներու` յատկապէս Ալպերթ Մկրտչեանի համար: Այդ հայկական ֆիլմի մշակոյթը ցոյց տալու ամենայարմար վայրն էր: Շատ անսպասելի ու շատ արագ` երեք շաբթուան ընթացքին այս ամէնը կազմակերպուած է: Ես ունէի հաւաքածոյ, իսկ տարածքը իմ լաւ բարեկամ Արթուր Դաւթեանի ընտանիքին կը պատկանի՚, լրագրողներուն տեղեկացուց Հայկ Դեմոյեանը` նշելով, որ անհրաժեշտ լուսանկարչական նիւթերը տրամադրած են Հայաստանի ազգային արխիւն ու Գրականութեան ու արուեստի թանգարանը:
Ցուցադրութեան հեղինակները վստահ են, որ զբօսաշրջիկներու մշտական այցելութիւններուն վայրը Կիւմրիի մէջ այս ցուցադրութեամբ աւելի պիտի սիրուի: Մինչեւ տարեվերջ ցուցադրութեան մուտքը անվճար պիտի ըլլայ:
