ՀՀ Առողջապահութեան նախարարութեան Վ.Ա. Ֆանարճեանի անուան Ուռուցքաբանութեան ազգային կեդրոնը (ՈՒԱԿ), կարեւորելով բժշկական ծառայութիւններու շարունակական զարգացումը, ՀՀ մարզերուն մէջ նախաձեռնած է գիտագործնական միջոցառումներու եւ գիտաժողովներու շարք, որ կը կրէ ՙՈւռուցքաբանական ֆորում՚ անուանումը:
Երկրորդ` ՙԵրեւան-Սիւնիք ուռուցքաբանական ֆորումը՚, տեղի ունեցած է Կապանի մէջ: Ֆորումի բացման ողջոյնի խօսքով հանդէս եկած է ՈՒԱԿ-ի տնօրէն Նարեկ Մանուկեանը, որ կարեւորած է պարբերաբար այցերը մարզեր, անոնց ծիրին մէջ տեղի բժիշկներուն հետ համագործակցութիւնները, բնակչութեան համար անվճար հետազօտութիւնները` կեդրոնի բժիշկներուն մասնակցութեամբ:
ՙՖորումի ընթացքին, որուն կը մասնակցէին շուրջ 20 մասնագէտ (ՈՒԱԿ-ի բաժանմունքներու ղեկավարներ, բժիշկներ), հանդէս եկան զեկոյցներով` մարզային գործընկերներու հետ կիսուելով իրենց փորձով, տարբեր գիտաժողովներու, մասնագիտական որակաւորումները բարձրացնող վերապատրաստումներու ընթացքին ձեռք բերած գիտելիքներով, ինչպէս նաեւ ներկայացուցին ՈՒԱԿ-ի մէջ վերջին շրջանին տեղի ունեցած փոփոխութիւնները, ձեռք բերուած սարք-սարքաւորումներու հնարաւորութիւնները, կատարուած բացառիկ վիրահատութիւնները:
Ֆորումին զուգահեռ Սիւնիքի մարզին մէջ բնակող քաղաքացիներուն համար ԱՆՎՃԱՐ հետազօտութիւններ եւ նեղ-մասնագիտական խորհրդատուութիւններ իրականացուցած են ՈՒԱԿ-ի արհեստավարժ բժշկական անձնակազմի ներկայացուցիչները:
Այս առումով հետազօտութիւն (կրծքագեղձ, վայանձեւ գեղձ, որովայն) անցաւ եւ նեղ-մասնագիտական խորհրդատուութիւններ ստացաւ մարզի աւելի քան 200 բնակիչ:
Ուռուցքաբանութեան ազգային կեդրոնի մարզային այցերը պիտի կրեն շարունակական բնոյթ: ՙՄեզի համար կարեւոր է, որ մեր երկրին բնակչութիւնը ստանայ որակեալ մասնագիտական խորհրդատուութիւն, հետագայում` բուժում, անկախ բնակութեան վայրէն՚, կը յայտնեն կեդրոնէն:
