Հայաստանեայց աւետարանական եկեղեցին իր ծնունդով հայկական է: Ահա թէ ինչու ան անուանուեցաւ Հայաստանեայց: Իր նպատակը հայ ժողովուրդի կեանքին մէջ զարգացնել եւ ամրապնդել էր հոգեւոր-մտաւոր արժէքներ, որուն հիմքը Աստուածաշունչի պատգամին ընկալումն էր իւրաքանչիւր հայորդիի համար: Եւ Աստուածաշունչը կարդալը եւ ընկալելը բոլոր հայորդիներու համար է առանց տարիքի եւ ուսման մակարդակի: Հայաստանեայց աւետարանական եկեղեցին իր այս առաքելութիւնը եթէ մէկ կողմէ իրագործեց եկեղեցական իմաստով, բայց նոյնքան նաեւ կրթական, ընկերային, մշակութային եւ այլ բնագաւառներէ ներս: Պատմական Հայաստանէն ու Կիլիկիայէն սկսած եւ արեւելեան Հայաստան ու Արցախ, եւ այսօր Սփիւռքի շատ մը երկիրներու մէջ, Հայաստանեայց աւետարանական եկեղեցին մնաց հաւատարիմ իր կոչումին եւ առաքելութեան մէջ: Ան այսօր կը շարունակէ իր ընթացքը` սատարելով հայ ժողովուրդի հոգեմտաւոր զարգացումին:
Հայաստանեայց աւետարանական եկեղեցին չհաւատաց ու մինչեւ այսօր թիւի ուժին: Անոր առաքելութիւնը հայ մարդուն հոգեւոր ուժը զարգացնելու համար է որ պիտի սատարէ հայ ժողովուրդին կեանքի շարունակականութեան: Հոգեւոր ուժն է որ կը կերտէ կեանք: Պատմութիւնը կը կերտուի եթէ թիւով, բայց շատ աւելի` հոգեմտաւոր կարողականութեամբ եւ զօրութեամբ: Այս իմաստով, հայ ժողովուրդի կեանքին վերջին 175 տարիներու ժամանակահատուածին մէջ, Հայաստանեայց աւետարանական եկեղեցին ունեցաւ իր կարեւոր ներդրումը հայուն հայապահպանումի եւ ազգապահպանումի կեանքի պատմութիւնը դնելով շարունակական գործընթացի մէջ: Եթէ պատմութիւնը իր անցեալով, բայց նոյնքան այսօր ու ապագայի տեսլականով:
Յարգանքի եւ երախտագիտական խօսք Հայաստանեայց աւետարանական եկեղեցւոյ հիմնադիր քառասուն անդամներուն: Բայց նոյնքան նաեւ անոր պատմութիւնը կերտած եւ մինչեւ այսօր իւրաքանչիւր եկեղեցական ու աշխարհական միտքին, որոնք ոչ մէկ ճիգ խնայեցին հայուն հոգեւոր արժէքները ու անոնց գնահատումը վառ պահելու համար:
Շնորհաւոր 175-ամեակ եւ բարի երթ նոր ամեակներու: Նոր ամեակներ, բայց մէկ կարեւոր տեսլական: Քրիստոսի, Եկեղեցիին ու հայ ժողովուրդին հոգեմտաւոր ու ազգային արժէքներու ամրապնդումին ի խնդիր:
Եւ այս Հայաստանեայց աւետարանական եկեղեցիին 175 տարիներու աւանդն է որ պիտի շարունակուի:
ԴՈԿՏ. ՀՐԱՅՐ ՃԷՊԷՃԵԱՆ
