Չորեքշաբթի, 24 Օգոստոս 2022-ին, Նոր Սերունդ Մշակութային Միութեան վարչութիւնը կազմակերպած էր շրջապտոյտ մը դէպի Լիբանանի հիւսիսային շրջանները: Երեք փոխադրակառքերով մօտաւորապէս 100 մասնակիցներ առաւօտեան կանուխ ժամերուն ճամբայ ելան դէպի Զղարթա: Տրամադրութիւնները բարձր էին մասնակիցներուն մօտ. ամառնային չնայած տաք, բայց պայծառ ու անամպ եղանակին, մարդիկ իրար մօտ գալով զուարճալի պահեր կ’անցընեն ու նոր էջեր կ’աւելցնեն իրենց յիշատակներու գիրքին մէջ:
Զղարթայի շրջանը բոլոր կողմերէն շրջապատուած է ձիթապտուղի եւ կիտրոնի այգիներով, նաեւ շրջապատուած է երկու գետերով: Մէկ խօսքով` հիանալի վայր: Շրջապտոյտին մասնակցիները ապա այցելեցին Ըհտընի շրջանը, վայելելով անոր գեղատեսիլ բնութիւնը:
Ապա փոխադրակառքերը կանգ առին Մըզիարայի Գթասրտութեան Մայր մատրան մօտ, որ երկնքի ու երկրի միջեւ դրախտային վայր մը ըլլայ կարծես: Բոլորին յայտնի է, որ հիւսիսային Լիբանանի Զղարթա շրջանին մէջ այցելուներուն կ’ողջունէ Գթասրտութեան Մայր մատուռը: Մուտքի կամարէն ներս այցելուները կը դիմաւորեն Քրիստոսի 12 առաքեալներու արձանները: Հրապարակը կը ներառէ նաեւ Քրիստոսի կերպարը եւ քանդակներ, որոնք կը մարմնաւորեն Աւետարանի տարբեր փուլերը` աւետում – փախուստ Եգիպտոս – Կանայի հարսանիք – ձիթենիի պուրակի տեսարան – խաչելութիւն – Յարութիւն:
Շրջապտոյտին մասնակիցները հաստատ որ վերամբարձ ապրումներ ունեցան ու իրենց աղօթներով վերացան այս իւրայատուկ սրբավայրին մէջ, որ ինչքան ալ նկարագրենք, բառերը ի վիճակի չեն արտայայտելու այդ սրբավայրին խորհրդաւորութիւնը:
Կէսօրուան ճաշը Պնըշիի լիճին մօտ ճաշարանի մը մէջ էր, ուր ներկաները ճաշակեցին լիբանանեան համեղ ուտեստներ, միեւնոյն ժամանակ իրար հետ զրուցելով, երգելով ու պարելով: Յաջորդ կանգառը Պաթրունի ծովափն էր: Ծովուն անզուգական հմայքը վայելելէ ետք մասնակիցները մուտք հանդիպեցան շրջանի Ս. Ստեփանոս (Մար Ըսթֆէն) եկեղեցի, աղօթով փակելու համար իրենց օրը:
Այնուհետեւ, օրուան աւարտին փոխադրակառքերը վերադարձան Պէյրութ. ընթացքին մթնոլորտը կը շարունակէր պահել ճոխութեան մակարդակը: Մասնակիցները իրար հետ կիսուեցան լաւ ու հաճելի օր մը անցուցած ըլլալու տպաւորութիւններով: Անոնք նաեւ շնորհակալութիւն յայտնեցին Նոր Սերունդ Մշակութային Միութեան վարչութեան անդամներուն` այս շրջապտոյտը կազմակերպելու, զիրենք համախմբելու եւ յիշատակելի օրուան մը առիթը տալու համար:
Վարձքը կատար Նոր Սերունդ Մշակութային Միութեան ժրաջան վարչականուհիներուն: