Ըստ լիբանանեան լրատուական աղբիւրներու, նշանակեալ վարչապետ Նեժիպ Միքաթի հասած է այն եզրակացութեան, թէ աւելի լաւ է կազմել նոր գործող կառավարութիւն, քան թէ մնալ գործակատարի վիճակին մէջ, ինչպէս որ է ներկայիս: Այս հարցը պիտի դառնայ հրատապ, մանաւանդ եթէ խորհրդարանը չկարենայ ընտրել երկրի նոր նախագահ, Սեպտեմբեր կամ Հոկտեմբեր ամիսներու ընթացքին: Ուրեմն ներքին եւ արտաքին ճնշումներ կան ժամ առաջ կազմելու համար նոր կառավարութիւն, որ պիտի ստանձնէ երկրին ղեկը նոր նախագահի ընտրութիւնը ուշանալու պարագային:
