ՀՀ կրթութեան, գիտութեան, մշակոյթի եւ մարմնակրթութեան նախարար Վահրամ Տումանեան ընդունած է Հայաստանի մէջ Պելառուսիոյ արտակարգ եւ լիազօր դեսպան Ալեքսանտր Քոնիւքը: Հանդիպման ներկայ եղած է նաեւ նախարարի տեղակալ Արթուր Մարտիրոսեանը:
Ողջունելով դեսպանին այցը նախարարութիւն եւ կարեւորելով երկու երկիրներուն միջեւ բարեկամական յարաբերութիւնները` Վահրամ Տումանեան վստահութիւն յայտնած է, որ կրթութեան, գիտութեան, մշակոյթի, մարմնակրթութեան եւ երիտասարդութեան ոլորտներուն մէջ անհրաժեշտ է աւելի սերտացնել համագործակցութիւնը:
Նախարարը շեշտադրած է համատեղ նախագիծերու իրականացումը` համոզմունք յայտնելով, որ հանդիպման շնորհիւ պիտի նախանշուին շարք մը գործնական քայլեր:
Վահրամ Տումանեանի խօսքով` յատկապէս գիտութեան եւ տեղեկատուական արհեստագիտութիւններու ոլորտին մէջ երկու երկիրները ունին շատ ընդհանրութիւններ եւ փորձի փոխանակման մեծ ներուժ:
Նախարարը նշած է, որ 2018-ին ստորագրուած է ՙՀայաստանի Հանրապետութեան Մշակոյթի նախարարութեան եւ Պելառուսիոյ Հանրապետութեան Մշակոյթի նախարարութեան միջեւ 2019-2022 թուականներու մշակութային համագործակցութեան մասին՚ ծրագիրը, որունհամաձայն` 2019 թուականի 16-19 Մայիսին կազմակերպուած է ՙՊելառուսիոյ մշակոյթի օրեր Հայաստանի մէջ՚ ծրագիրը: Ըստ Վահրամ Տումանեանի` 2020-ին Պելառուսիոյ մէջ կը նախատեսուէր կազմակերպել Հայաստանի մշակոյթի օրերը, ինչ որ, ցաւօք, չէ կայացած` Քովիտ-19 համավարակով եւ պատերազմով պայմանաւորուած: Նախարարը յոյս յայտնած է, որ յառաջիկային հնարաւոր պիտի ըլլայ զանոնք կազմակերպել` հաշուի առնելով համատեղ ծրագրերն ու նախագծերը:
Դեսպան Ալեքսանտր Քոնիւքը շնորհակալութիւն յայտնած է իրենց նախաձեռնութիւններուն եւ առաջարկներուն արագ արձագանգելու համար: Ան մատնանշած է այն ուղղութիւնները, որոնցով պելառուսական կողմը պատրաստ է գործնական քայլերու` ընդգծելով, որ Հայաստանի մէջ կրթութեան որակը բարձր է: Դեսպանը Վահրամ Տումանեանը հրաւիրած է Պելառուսիա` ծանօթանալու այդ երկրի գիտակրթական եւ մշակութային հաստատութիւններու գործունէութեան, յատկապէս` տեղեկատուական արհեստագիտութիւններու ոլորտին մէջ պելառուսական փորձին:
Կողմերը անդրադարձած են նաեւ երկուստեք հետաքրքրութիւն ներկայացնող այլ հարցերու եւ գործնական քայլերու անցնելու վերաբերեալ պայմանաւորուածութիւն ձեռք բերելու:
