ՙՕրորա՚ի հերոսները ընտրած են շահոյթ չհետապնդող կազմակերպութիւններ, որոնք կը տրամադրեն մարդասիրական օգնութիւն, կը նպաստեն խաղաղութեան, կը պաշտպանեն մարդու իրաւունքները, հասանելի կը դարձնեն բժշկական ծառայութիւնները եւ կ՛օգնեն խոցելի համայնքներուն:
19 Օգոստոսին` Մարդասիրութեան համաշխարհային օրը, ՙՕրորա՚ մարդասիրական նախաձեռնութիւնը ներկայացուցած է 2022 թուականի ՙՕրորա՚ի հերոսներուն առաջադրած կազմակերպութիւնները: 2022-ին երեք հերոսներէն մէկը պիտի դառնայ ՙՕրորա՚ մրցանակի դափնեկիր, որուն անունը պիտի յայտարարուի Իտալիոյ Վենետիկ քաղաքին մէջ 15 Հոկտեմբեր 2022-ին: Հայոց ցեղասպանութենէն վերապրողներուն անունով, ի երախտագիտութիւն զանոնք փրկողներուն, դափնեկիրը պիտի ունենայ բացառիկ հնարաւորութիւն` շարունակելու նուիրատուութեան շղթան` 1.000.000 տոլար մրցանակին մէկ մասը յատկացնելով առաջադրած կազմակերպութիւններուն:
2022-ին ՙՕրորա՚ի հերոսները որոշած են աջակցիլ կազմակերպութիւններու, որոնք կը տրամադրեն մարդասիրական օգնութիւն, կը նպաստեն խաղաղութեան, կը պաշտպանեն մարդու իրաւունքները, կ՛օգնեն խոցելի եւ տեղահանուած համայնքներուն, ինչպէս նաեւ հասանելի կը դարձնեն բշկական օգնութիւնը:
Ճամիլա Աֆղանին (Աֆղանստան), որ խաղաղութեան աքթիվիսթ է եւ ՙՆուռ՚ կրթութեան եւ կարողութիւններու զարգացման կազմակերպութեան (NECDO) հիմնադիրը, 25 տարի պայքարած է կրթութիւնը Աֆղանիստանի կանանց հասանելի դարձնելու համար, առաջադրած է հետեւեալ կազմակերպութիւնները`
Կանանց միջազգային լիկա յանուն խաղաղութեան եւ ազատութեան (WILF), ՙՆուռ՚ կրթութեան եւ կարողութիւններու զարգացման կազմակերպութիւն (NECDO):
Հատի Ճումաան (Եմէն)` խաղաղութեան աքթիվիսթ եւ միջնորդ-բանակցող, որ, պարբերաբար վտանգելով սեփական կեանքը, կը կազմակերպէ ռազմագերիներու փոխանակում եւ առաջնագիծէն դուրս կը բերէ զոհուածներու մարմինները, առաջադրած է հետեւեալ կազմակերպութիւնները`
ՙՕգնութիւն Եմէնին՚ կազմակերպութիւն (Yemen Aid),
ՙԵմէնի գործընկերներ՚ կազմակերպութիւն (Partners Yemen):
Մահինուր Մասրին (Եգիպտոս)` փաստաբան եւ քաղաքական աքթիվիսթ, որ կը պայքարի երկրին մէջ քաղաքական ազատութիւններու եւ մարդու իրաւունքներու համար` կազմակերպելով բողոքի խաղաղ շարժումներ եւ դատարանին մէջ պաշտպանելով քաղաքական բանտարկեալներու իրաւունքները, առաջադրած է հետեւեալ կազմակերպութիւնները`
ՙԳործել յանուն յոյսի՚ կազմակերպութիւն (Action For Hope),
ՙՄերսալ՚ հիմնադրամ (Mersal Foundation):
ՙՄարդասիրութեան համաշխարհային օրը հիանալի հնարաւորութիւն է մեծարելու ՙՕրորա՚ի հերոսներուն նման մարդիկ, որոնք կը վտանգեն սեփական անձը` փրկելու ուրիշներ: Այս տարուան հերոսներուն առաջադրած կազմակերպութիւնները ու անոնց կատարած կենսական աշխատանքը արդէն փոխած են հազարաւոր մարդոց կեանքեր: Եւ մենք յոյս ունինք, որ ՙՕրորա՚ին աջակցութեամբ անոնք պիտի կրնան աւելին ընել՚, նշած է ՄԱԿ-ի Մարդու իրաւունքներու հարցերով նախկին գերագոյն յանձնակատար եւ ՙՕրորա՚ մրցանակի Ընտրող յանձնաժողովի անդամ Մերի Ռոպինսընը:
2022 թուականին ՙՕրորա՚ մրցանակի շնորհման արարողութիւն ու անոր ուղեկցող յատուկ միջոցառումները տեղի պիտի ունենան Իտալիոյ Վենետիկ քաղաքին մէջ 14-16 Հոկտեմբեր 2022-ին: ՙՕւրորա՚ն պիտի համախմբէ մարդասիրութեան ոլորտի աշխարհի առաջատարները` արժանին մատուցելու մերօրեայ հերոսներուն, փառաբանելու մարդկայնութեան ոգին եւ զօրացնելու մարդոց օգնութեան ձեռք մեկնողներու յաջորդ սերունդը:
