Թուրքիոյ նախագահ Ռեճեպ Թայիփ Էրտողան յայտարարեց, որ իրենց նպատակը չէ յաղթել Սուրիոյ նախագահ Պաշշար Ասատի վարչակարգին, այլ պայքարիլ ահաբեկչութեան դէմ Սուրիոյ հիւսիսային եւ հիւսիսարեւելեան շրջաններուն մէջ: Ան աւելցուց, թէ իրենք որեւէ նպատակ չունին սուրիական հող գրաւելու, ՙսուրիացի ժողովուրդը մեր եղբայրն է ու անոր ապահովութիւնը կարեւոր է՚:
Ան աւելցուց, որ պէտք է դիւանագիտութիւնը օգտագործել հարցերը լուծելու համար եւ Սուրիոյ հետ այդ մէկը պէտք է սկսիլ: Էրտողան աւելցուց, որ իրենք կրեցին սուրիական տագնապին պատասխանատուութիւնը եւ լուծումին մաս կազմեցին: Ըստ Էրտողանի, իր նպատակը շրջանային խաղաղութիւնն է եւ այդ մէկուն կարելի է հասնիլ Սուրիոյ հետ բանակցելով, իրենց դէմ պատրաստուող դաւադրութիւնը ձախողցնելու համար:
Էրտողան ամբաստանեց ամերիկեան ու անոնց դաշնակից ուժերը ահաբեկչութիւնը գործածելու մէջ: Թուրքիոյ նախագահը նաեւ դրական խօսքեր ըսաւ եգիպտացի ժողովուրդին մասին:
