Մոսկուայի եւ Համայն Ռուսիոյ Կիրիլ պատրիարքը ցաւակցական հեռագրեր յղած է Հայաստանի Հանրապետութեան վարչապետ Նիկոլ Փաշինեանին եւ Ամենայն Հայոց Գարեգին Բ. կաթողիկոսին Երեւանի ՙՍուրմալու՚ առեւտրի կեդրոնին մէջ 14 Օգոստոսին տեղի ունեցած ողբերգական դէպքին` հրավառութեան պահեստի պայթումին հետեւանքով մարդոց մահուան կապակցութեամբ:
Վարչապետ Նիկոլ Փաշինեանին ուղղուած իր ցաւակցական հեռագրին մէջ Ռուսիոյ հոգեւոր առաջնորդը նշած է, որ խոր ցաւով ընդունած է Երեւանի առեւտուրի կեդրոնին մէջ տեղի ունեցած ողբերգութեան մասին տեղեկութիւնը, մասնաւորապէս այն, որ հրդեհի եւ շէնքի փլուզման հետեւանքով բազմաթիւ զոհեր եւ վիրաւորներ կան:
ՙԽորապէս կը կարեկցիմ եղբայրական Հայաստանի ժողովուրդին եւ կը խնդրեմ անկեղծ ցաւակցութիւնս փոխանցել բոլոր անոնց, որոնց առնչուած է այս սարսափելի դժբախտութիւնը, յատկապէս անոնց, որոնք կորսնցուցած են իրենց հարազատներն ու մտերիմները: Կ՛ուզեմ վստահեցնել Ձեզի, որ Ռուս Ուղղափառ Եկեղեցին, ի դէմս երեւանեան-հայաստանեան թեմի հոգեւորականներուն եւ աշխարհականներուն, պատրաստ է բարոյական աջակցութիւն ցուցաբերելու բոլոր անոնց, որոնք ունին անոր կարիքը: Թող բարերար Տէրը ողորմութեամբ ընդունէ հանգուցեալներուն հոգիները, մխիթարէ սգաւորները եւ շուտափոյթ ապաքինում շնորհէ տուժածներուն՚, նշուած է Կիրիլ պատրիարքի ցաւակցական ուղերձին մէջ:
Մոսկուայի եւ Համայն Ռուսիոյ պատրիարքը եղբայրական ուղերձ հասցէագրած է նաեւ Ամենայն Հայոց Գարեգին Բ. կաթողիկոսին, անկեղծ ցաւակցութիւն յայտնելով ամբողջ հայ ժողովուրդին ` տեղի ունեցածին առիթով եւ յոյս յայտնելով, որ Ամենաողորմած Արարիչը հանգստութիւն պարգեւէ զոհուածներու հոգիներուն, շուտափոյթ ապաքինում շնորհէ վիրաւորներուն եւ մխիթարէ սգաւորները:
