14 Օգոստոսին Հայաստանեայց Առաքելական Սուրբ Եկեղեցին նշեց Սուրբ Մարիամ Աստուածածնի Վերափոխման տօնը:
Բերկրառատ օրուան առիթով Մայր Աթոռ Սուրբ Էջմիածնի միաբանութիւնը, Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսին գլխաւորութեամբ, Սուրբ Գայիանէ վանքին մէջ մասնակցեցաւ Պատարագի սրբազան արարողութեան: Պատարագիչն էր Մայր Աթոռի Վանորէից տեսուչ գերաշնորհ Տ. Արտակ եպիսկոպոս Տիգրանեանը:
Ներկայացնելով տօնին խորհուրդը` պատարագիչ Սրբազանը մասնաւորապէս ընդգծեց. ՙՎերափոխման յիշատակի այս տօնը մեզի կարեւոր պատգամ կը փոխանցումէ. ըլլալ տէր եւ հնազանդ Աստուծոյ կամքին: Աստուածածինը մեզ ամէնքիս Իր կեանքի կարեւորագոյն պատգամներէն մէկը կը փոխանցէ` Աստուծոյ խօսքին, աւետարանական պատգամին կատարեալ հնազանդութեամբ կեանք ունենալ: Սուրբ Աստուածամօր օրինակով կոչուած ենք հնազանդուելու Երկնաւոր Հօրը, կոչուած ենք հաւատքով դառնալու Աստուծոյ լոյսի կրողներն ու այն տարածողները, որպէսզի աշխարհը եւ մենք խաւարի մէջ չմնանք՚:
Աւարտին Արտակ Սրբազանը հայցեց Տիրամօր բարեխօսութիւնը մարդու եւ Աստուծոյ հաշտութեան համար` պատգամելով վերափոխուիլ ու մեր անձերը աղօթքով սրբագործել:
Սուրբ Պատարագի աւարտէն յետոյ եկեղեցական թափօրը Սուրբ Գայիանէ վանքէն ուղղուեցաւ դէպի Մայր Աթոռ Սուրբ Էջմիածնի Սուրբ Տրդատի բաց խորան, ուր հանդիսապետութեամբ Ամենայն Հայոց կաթողիկոսին, կատարուեցաւ ՙԽաղողօրհնէք՚ի հանդիսաւոր կարգը: Օրհնուած խաղողի ողկոյզները բաժանուեցան հաւատաւոր ժողովուրդին:
