Անցեալ շաբաթ Ռուսիոյ Սոչի քաղաքին մէջ տեղի ունեցաւ Փութին-Էրտողան ժողովը: Ինչպէս միշտ, այս անգամ ալ Ռուսիան փորձեց տնտեսութիւնը օգտագործել Թուրքիան իր կողմը պահելու համար: Սուրիոյ պատերազմի սկիզբէն ի վեր եւ Հարաւային Կովկասի ու Լիպիոյ մէջ երկու կողմերու միջեւ անհամաձայնութիւններլու լուծումի բանալին միշտ տնտեսութիւնն էր: Ռուսիա, խայծեր տալով Թուրքիոյ, կը փորձէ զայն հեռու պահել Արեւմուտքի ճակատէն: Այս անգամ ալ երկու կողմերը համաձայնեցան Ուքրանիոյ սրտադրած հացահատիկի փոխադրութեան շուրջ համաձայնագիրը գործադրել: Համաձայնեցան նաեւ պահել ներկայ ռուսական բնական կազի Եւրոպա փոխադրութեան պայմանները, անցնելով Թուրքիայէն: Նաեւ գոհունակութիւն յայտնեցին, որ երկու երկիրներուն միջեւ առեւտուրը 2021-ին աճած է 57 առ հարիւր համեմատութեամբ: Երկու կողմերը նաեւ համաձայնեցան Սուրիոյ եւ Լիպիոյ պարագաներուն, պահել այդ երկիրներու հողային ամբողջականութիւնը եւ գերիշխանութիւնը: Ժողովուրդին տալ առիթը ընտրելու իրենց ղեկավարները: Կողմերը համաձայնեցան նաեւ շարունակել պայքարը ահաբեկչութեան դէմ, իւրաքանչիւրը իր հասկցած ձեւով անշուշտ: