Իրանի կողմէ հիւպատոսի մը նշանակումը Սիւնիքի մարզին մէջ առաջին նշանն է այն քաղաքականութեան, որ սկսած է վարել Իրանը հարաւային Կովկասի մէջ սահմանային որեւէ փոփոխութիւն չուզելով: Այս հիւպատոսին դերը կրնայ ըլլալ տնտեսական յարաբերութեան զարգացումը Իրանի եւ Հայաստանի հարաւային Սիւնիքի եւ վայոց Ձորի մարզերուն հետ: Տնտեսական զարգացումը հայ մարդը պիտի պահէ իր հողին վրայ, այսպիսով կանխելով Սիւնիքի որեւէ մաս ուրիշ որեւէ երկրի յանձնելը, Թուրքիան Ատրպէյճանին կապելու պատրուակով: Իրանի առած քայլերը այս ուղղութեամբ կարեւոր քայլեր են: Ան շատ լաւ գիտէ, որ բանալով ճամբան Թուրքիոյ եւ Ատրպէյճանի միջեւ, պիտի վտանգուի իր ցամաքային կապը իր ռազմավարական գործընկեր Ռուսիոյ հետ, որ կ’անցնի Հայաստանէն: Այս դրացին ամէն բան պիտի կատարէ կանխելու համար Նախիջեւան-Ատրպէյճան ճամբու բացումը:
