Ամերիկեան նշանաւոր ՙForeign Policy՚ պարբերաթերթին մէջ, Մաքսիմիլիըն Հես կը գրէ, որ Արեւմուտքը պէտք է գտնէ նոր ձեւ մը Արցախի մէջ երրորդ պատերազմը կանխելու համար: Ներկայիս Ատրպէյճան կը համարուի Եւրոպան բնական կազով մատակարարող կարեւոր աղբիւրներէն մէկը: Ռուսիայէն կազի պահանջարկի կախեալութիւնը նուազեցնելու գործին մէջ մեծ դեր կը խաղայ Ատրպէյճան: Պատերազմի մը բռնկումի պարագային, ի՞նչ կը վստահեցնէ, որ ատրպէյճանական կազի մատակարարումը պիտի տեւէ անխափան: Ռուսիա որքա՞ն թոյլատու պիտի գտնուի իր կազի մատակարարումի կարեւորութիւնը նուազեցնող որեւէ քայլի: Նաեւ Արեւմուտքի թոյլատու քաղաքականութեան պարագային, Ատրպէյճան եթէ դարձեալ յաղթէ, մեծ հաւանականութեամբ Հայաստանի մէջ իշխանութեան կրնան հասնիլ ռուսամէտ ուժեր, որոնք աւելի մօտ պիտի ըլլան Ռուսիային քան Արեւմուտքին: Ուրեմն, այս վերոյիշեալ պայմանները նկատի առնելով, Արեւմուտքը պէտք է վարէ հաւասարակշռուած քաղաքականութիւն մը հարաւային Կովկասը հեռու պահելու համար պատերազմէ:
