ՙԱրարատ՚ օրաթերթը այս տարի կը դառնայ 85 տարեկան: Տասնամեակներ շարունակ Լիբանանի, Հայաստանի եւ հայ ժողովուրդի առօրեային ընկերակցած օրաթերթը եւս ապրած է յաջողութիւններու եւ մարտահրաւէրներու օրեր, յաղթահարած է ապահովական, քաղաքական եւ տնտեսական բազում դժուարութիւններ, սակայն իր լրատուական, լրագրական եւ ազգային երթը կը շարունակէ, որպէս Սոցիալ Դեմոկրատ Հնչակեան Կուսակցութեան Լիբանանի շրջանի պաշտօնական օրկանը: Իր հրատարակումի 85-ամեակին առթիւ, եւ քայլ պահելով արհեստագիտական նորարարութիւններուն հետ, ՙԱրարատ՚ օրաթերթը իր ընթերցողներուն եւ գաղութի զաւակներուն համար հանդէս կու գայ երկու նոր նախաձեռնութիւններով.
Առաջինը` հիմնովին բարեփոխուած եւ արդիականացած կայքն է` Araraddaily.com, որ արդէն սկսած է գործել ցանցին վրայ, շնորհիւ հայազգի բարերարի մը, որ գնահատելով ՙԱրարատ՚-ի գործունէութիւնը, ստաձնած է կայքը բարեկարգելու եւ աշխուժացնելու ֆինանսաւորումը: ՙԱրարատ՚-ի անունով շնորհակալութիւն կը յայտնենք այդ բարերարին:
Երկրորդ նորութեամբ, ՙԱրարատ՚ օրաթերթը 2022-ի առաջին ամիսներէն ի վեր կը համագործակցի լիբանանեան լրատուական բջջային առաջատար app-երէն ՙINFO3՚-ին հետ` խմբագրելով անոր հայերէնով` լիբանանեան, հայկական եւ միջազգային լուրերը: INFO3-ն iOS եւ Android համակարգերով բանող սարքերու վրայ անվճար հասանելի է Appstore-ի եւ Playstore-ի միջոցաւ եւ օրուան ամբողջ ընթացքին բաժանորդներուն վայրկեանը վայրկեանին կը տրամադրէ լիբանանեան, շրջանային եւ միջազգային բոլոր լուրերը` քաղաքական, ապահովական, տնտեսական, մարզական, արուեստի եւ այլ ոլորտներու մէջ: Լուրերը կը ներկայացուին երեք մակարդակի վրայ` խորագիր, ամփոփ լուր եւ մանրամասնուած լուր, ընլերցողին հնարաւորութիւն տալով իւրաքանչիւր լուրին համար ընտրել նախասիրած ընտրանքը եւ լուրերու լեզուն: INFO3-ն լուրեր կը ներկայացնէ արաբերէն, հայերէն, անգլերէն, ֆրանսերէն, սպաներէն եւ փորթուկալերէն լեզուներով: ՙԱրարատ՚-ի խմբակը կը խմբագրէ INFO3-ի հայերէն լուրերը, անոնց կցելով նաեւ Հայաստանի, Արցախի եւ Սփիւռքի լուրերը, ոչ միայն հայերէն, այլ մնացեալ լեզուներով եւս, որպէսզի անոնք հասանելի ըլլան նաեւ ոչ-հայերուն: Կարճ ժամանակի մէջ, INFO3-ն դարձած է Լիբանանի մէջ այս ոլորտի առաջատարը:
