Կիրակի, 3 Յուլիս 2022-ի երեկոյեան ժամը 8:00-ին, Հալէպի Կիլիկեան Ճեմարանի շրջափակէն ներս տեղի ունեցաւ 2021-2022 ուսումնական տարեշրջանի միջնակարգի աւարտական ամավերջի հանդէսը:
Հանդիսութեան ներկայ էին Ս.Դ.Հ.Կ.-ի Սուրիոյ Հիւսիսային Շրջանի Վարիչ Մարմինի ատենապետը եւ անդամները, Կիլիկեանի հոգաբարձութիւնը, տնօրէնութիւնը եւ ուսուցչական կազմը, ինչպէս նաեւ կուսակցութեանս հովանաւորութիւնը վայելող մշակութային, մարզական, Ուս.-Երիտ., տիկնանց միութիւններու ներկայացուցիչները:
Սուրիոյ եւ Հայաստանի քայլերգներով հանդէսին բացումը կատարուեցաւ, ապա ներկաները մէկ վայրկեան յոտնկայս լռութեամբ յարգեցին արաբ եւ հայ նահատակներուն յիշատակը:
Բացման խօսքը հայերէնով եւ արաբերէնով կատարուեցաւ աւարտականի աշակերտ-աշակերտուհիներու կողմէ:
Գեղարուեստական կոկիկ յայտագիրը կþընդգրկէր հայկական եւ արաբական պար, խմբային ասմունք` Եղիշէ Չարենցի բանաստեղծութիւններէն, իսկ երգչախումբը ներկայացուց փունջ մը հայրենասիրական երգեր:
Հայերէն եւ արաբերէն ուղերձները ընթերցուեցաւ 9-րդ կարգի աշակերտութեան կողմէ. անոնք շնորհակալութիւն յայտնեցին Կիլիկեան Ճեմարանի հոգաբարձութեան, տնօրէնութեան, ուսուցչական կազմին, ազգանուէր բարերարներու եւ ծնողներունª ամբողջ տարուան ընթացքին իրենց ցուցաբերած հոգատարութեան համար: Անոնք խոստացան մնալ իրենց նախնիներուն նման` գիտութեան եւ ուսման մէջ պատուաբեր արդիւնքներ ապահովել, մնալ հաւատարիմ Կիլիկեան ճեմարանի ուխտին:
Ապա հրաւիրուեցաւ Կիլիկեան Ճեմարանի տնօրէն Պրն. Յովհաննէս Ջուլճեան փոխանցելու տնօրէնութեան պատգամը: Ան շնորհակալութիւն յայտնեց ուսուցչական կազմին, բարերարներուն եւ բոլոր անոնց, որոնք նիւթապէս եւ բարոյապէս սատարեցին Կիլիկեան Ճեմարանին: Աւարտին ան իր խօսքը ուղղելով աշակերտներուն` ըսաւ, թէ երեք տարուան աշխատանքին արդիւնքով դուք հասաք այս օրուան ու մաղթեց բոլորին, որ պետական քննութիւններուն փայլուն արդիւնքներ ապահովեն: Տնօրէնը մեծ դրուատիքով ուժ եւ կորով մաղթեց Սուրիոյ Արաբական Հանրապետութեան իմաստուն եւ խոհեմ վսեմաշուք նախագահ Տոքթ. Պաշար Հաֆէզ Ասատին, որպէսզի Սուրիան առաջնորդէ դէպի բարգաւաճ երկիրª անցեալին նման:
Ժամը հասած էր վկայականաց բաշխումին, ուր տնօրէն Պրն. Յովհաննէս Ջուլճեանի եւ տեսուչ տիկին Քարէն Չոփուրեանի ձեռամբ կատարուեցաւ արարողութիւնը:
Հանդիսութեան ընթացքին տիկին Քարէն Չոփուրեան ընթերցեց Ամերիկայի Կիլիկեան Բարեգործական Միութեան նամակը` ուղղուած Կիլիկեան Ճեմարանի մեծ ընտանիքին, նաեւ մաղթեց շրջանաւարտներուն փայլուն ապագայ, ամբողջական զօրակցութիւն յայտնելով Կիլիկեանին, բարձր պահելու Կիլիկեան Ճեմարանի ջահը սերունդէ սերունդ: Տիկին Չոփուրեան շնորհակալական խօսք ուղղեց երկկողմանի գործակցութեան համար, որ փայլուն ապագայ կը խոստանայ անկեղծ համագործակցութեան որպէս արդիւնք:
Այս տարի նաեւ տեղի ունեցաւ պարգեւատրում այն աշակերտներուն, որոնք 2020-2021 տարեշրջանի բարձրագոյն միջին եւ առաջնութիւն ապահոված էին: Անոնք ստացան նիւթական պարգեւª բարերար ընկեր Ճորճ Թաւուքճեանի կողմէ, ինչպէս նաեւ Կիլիկեան Ճեմարանի հոգաբարձութեան կողմէ նիւթական պարգեւներ ստացան հայոց լեզուի բարձրագոյն նիշ եւ առաջնութիւն ապահոված աշակերտները:
Հանդիսութեան աւարտին տեղի ունեցաւ խրախճանք Կիլիկեան Ճեմարանի նախակրթարանի բաժնին մէջ, ծնողներուն ներկայութեամբ:
Շնորհաւոր, սիրելի շրջանաւարտներ, կանաչ ճանապարհ կը մաղթենք բոլորիդ:
ԳԷՈՐԳ ՎԱՀԱՆ ՏԱՂԼԵԱՆ
