Թուրքիոյ արտաքին գործերու նախարար Մեվլութ Չավուշօղլու յայտարարեց, որ հայ-թրքական բանակցութեան ընթացքին, իրենք բոլոր քայլերը կը համակարգեն Ատրպէյճանի ղեկավարութեան հետ: Ան զարմանք յայտնած է, թէ որոշ հայկական շրջանակներ կ’անհանգստանան այս իրականութենէն: Ան կոչ ուղղած է Հայաստանին վճռական քայլերու երթալու իր քաղաքականութեան մէջ:
Միւս կողմէ, յայտնի դարձաւ, որ հայ-թրքական յաջորդ` 5-րդ ժողովը տեղի պիտի ունենայ Կարս քաղաքին մէջ: Այս ժողովին ներկայ պիտի ըլլան նաեւ Տնտեսութեան, Արտաքին գործերու նախարարութեան եւ ենթակառուցուածքի հատուածներու ներկայացուցիչներ: Ներկայիս, քննութիւն կը կատարուի Արաքս գետին վրայ գտնուող կամուրջին վրայ, նաեւ պիտի վերանորոգուի Անիի աւերակներուն մօտ գտնուող Մետաքսի կամուրջը, որ գործելու պարագային, պիտի բարելաւէ երկու երկիրներու միջեւ յարաբերութիւնը, ըստ թրքական աղբիւրներու:
