Գեղարքունիքի մարզպետ Կարէն Սարգսեան աշխատանքային այցով եղաւ Վարդենիսի բժշկական կեդրոնին մէջ: Մարզպետը բժշկական կեդրոնի հիւանդանոցային եւ փոլիքլինիքական ծառայութիւններ մատուցող մասնաշէնքերուն մէջ ծանօթացաւ աշխատանքային պայմաններուն, վերջին մէկ տարուան տեխնիկական վերազինումներուն եւ նորոգման աշխատանքներուն, շրջեց բաժանմունքներուն մէջ, հիւանդասենեակներուն մէջ, զրուցեց բժշկական անձնակազմին հետ: Ինչպէս ներկայացուց Վարդենիսի բժշկական կեդրոնի տնօրէն Շահէն Շահինեանը, վերջին տարիներու ընթացքին Վարդենիսի հիւանդանոցին մէջ բարելաւուած են վիրաբուժական, կնկաբուժութեան, էքս-րէյ հետազօտութեան, փոլիքլինիքին մէջ` ակնաբուժական ծառայութիւնները: Տարբեր բարեգործական ծրագրերու միջոցով կամ տնտեսուած միջոցներու հաշուոյն որոշակիօրէն բարելաւուած են նաեւ շէնքային ու աշխատանքային պայմանները, սակայն որակեալ բժշկական ծառայութիւններու մատուցման համար արդէն միաւորուած բժշկական հաստատութիւնը պէտք է արմատապէս վերազինուի նորագոյն սարքաւորումներով, ունենայ շէնքային բարձրակարգ պայմաններ, համալրուի որակեալ բժիշկ մասնագէտներով, նեղ մասնագիտական նոր ծառայութիւններով:
Ամփոփելով աշխատանքային այցին արդիւնքները` մարզպետ Կարէն Սարգսեանը հաւաստիացուց բժշկական անձնակազմին, որ շատ շուտով կարգաւորուին բոլոր խնդիրները, երբ Վարդենիսը պետական հոգածութեամբ պիտի ունենայ արդի չափորոշիչներուն համապատասխան բժշկական կեդրոն` յագեցած բժշկական նորագոյն սարքաւորումներով, շէնքային պայմաններով եւ որակեալ բժիշկներով:
ՙԱյժմ փորձաքննութիւն կ՛ընթանայ Վարդենիսի հիւանդանոցի սէյսմակայունութեան վիճակին շուրջ: Եթէ փորձաքննութեամբ հաստատուի, որ շէնքը ունի բաւարար սէյսմակայունութիւն, ապա մենք կանգ պիտի առնենք հիւանդանոցի ընդհանուր նորոգման եւ վերազինման տարբերակին վրայ, իսկ եթէ պարզուի, որ շէնքին սէյսմակայունութիւնը չի բաւարարեր, ուրեմն պիտի ձեռնարկէ նոր շէնքի կառուցումը նոյն հիւանդանոցի տարածքին մէջ, որ պիտի ունենայ բժշկական ծառայութիւններու մատուցման ամենաժամանակակից պայմանները՚, ըսաւ մարզպետ Կարէն Սարգսեանը:
