ՀՀ Կրթութեան, գիտութեան, մշակոյթի եւ մարմնակթութեան նախարարութեան աջակցութեամբ ՙՖիլմադարան՚ ֆիլմի մշակոյթի զարգացման հասարակական կազմակերպութիւնը 21-28 Օգոստոսին ՀՀ Արագածոտնի մարզի Ուջան գիւղին մէջ պիտի իրականացնէ ՙԾիրանի ծառ՚ Ուջանի վաւերագրական ֆիլմերու 8-րդ միջազգային փառատօնը:
Փառատօնի ծրագրին մէջ ընդգրկուած է 30 վաւերագրական ֆիլմ շուրջ 20 երկրէ` Հայաստանէն, Իրանէն, Ռուսիայէն, ԱՄՆ-էն, Իտալիայէն, Սերպիայէն, Շուէտէն, Վիեթնամէն, Ֆրանսայէն եւ այլն:
Ցերեկային ցուցադրութիւնները պիտի ըլլան Երեւանի մէջ` Հայաստանի ազգային գրադարանի մեծ դահլիճին մէջ, իսկ երեկոյեան ժամը 20:00-էն մինչեւ կէսգիշեր` Ուջանի այգիին մէջ` բաց երկնքի ներքոյ: Ամերիկահայ բեմադրիչ (հոլանտաբնակ) եւ ֆիլմի տեսաբան Թինա Պասթաճեանը Հայաստանի ազգային գրադարանին մէջ հանդէս պիտի գայ ՙWalking through the Interactive Documentary: Speculative Interfaces and Thresholds՚ դասախօսութեամբ:
Բոլոր ֆիլմերը պիտի ցուցադրուին հայերէն ենթագրերով: Փառատօնի շրջանակին մէջ պիտի գործէ նաեւ Ուջանի ֆիլմի դպրոցը, ուր ուջանցի երեխաները, փառատօնի մասնագէտներուն օգնութեամբ պիտի նկարեն կարճամեթրաժ ֆիլմեր, որոնք պիտի ցուցադրուին փակման արարողութեան ժամանակ: Դպրոցը կը գործէ 2019 թուականէն:
Վիեթնամէն ժամանած բեմադրիչ եւ արուեստագէտ Թհու Ան Նկիւյէնը պիտի վարէ քոլաժի աշխատարան Ուջանի եւ յարակից գիւղերու նկարչական խմբակներու երեխաներուն համար. ստեղծուած քոլաժները պիտի ցուցադրուին փառատօնի աւարտին:
Հայ եւ վրացի երիտասարդ ֆիլմի բեմադրիչներու համար յատուկ աշխատարան պիտի վարէ հոլանտացի ֆիլմի գործիչ Տիրք Վիլեմսենը:
Փառատօնի շրջանակին մէջ Ուջան ժամանած արտերկրեայ շուրջ 30 հիւրերը մէկ շաբաթ պիտի ապրին ուջանցիներու տուներուն մէջ, պիտի ծանօթանան հայկական կենցաղին եւ մշակոյթին:
