Ամերիկացի ձեռնարկատէր Իլոն Մասք յայտարարած է, որ կրնայ վերաթարմացնել Թուիթըրը գնելու գործարքը, եթէ ընկերութիւնը կարենայ ապացուցել ընկերային ցանցի օգտահաշիւներու իսկութիւնը: Այս մասին ան գրառում կատարած է Թուիթըրի էջով:
ՙԵթէ Թուիթըր պատահաբար ընտրէ 100 օգտահաշիւ եւ ուղղակի ցոյց տայ, թէ ինչպէս կ՛ապացուցէ անոնց իրական ըլլալը, ապա գործարքը պիտի կնքուի ամենասկզբնական պայմաններով՚, յայտնած է ան:
Ապրիլին Թուիթըրի ղեկավարութիւնը յայտնած էր, որ Մասք առաջարկած է գնել զայն 44 միլիառ տոլարով: Մայիսին ձեռնարկատէրը տեղեկացուց, որ կը փորձէ ստանալ տեղեկատուութիւն այն մասին, որ Թուիթըրի մէջ կեղծ օգտահաշիւները 5 տոկոսէն պակաս են:
Յուլիսի սկիզբը Մասքի իրաւաբանները տեղեկացուցած էին Թուիթըրին, որ ան կը հրաժարի ընկերային ցանցը գնելու մտադրութենէն, քանի որ ընկերութիւնը չէ կատարած համաձայնագրով նախատեսուած շարք մը պարտաւորութիւններ, այդ շարքին եւ կեղծ էջերու մասին լիարժէք տեղեկատուութեան տրամադրումը:
12 Յուլիսին Թուիթըրը Մասքի դէմ հայց ներկայացուց դատարան: Դատական լսումները նախատեսուած են Հոկտեմբերին: 29 Յուլիսին Իլոն Մասք պատասխան հայց ներկայացուցած է Թուիթըրի դէմ:
