Արցախի Հանրապետութեան պետական նախարար Արտակ Բեգլարեան մասնակցած է ընկերային զարգացման եւ գաղթականութեան նախարարութեան կազմակերպած ՙԱշխատանքի տօնավաճառ՚-ի բացման արարողութեան, որ մէկ հարկի տակ համախմբած է 200 մասնագիտութիւններու առնչութեամբ 1500-է աւելի աշխատողի կարիք ունեցող 61 գործատու եւ բազմաթիւ աշխատանք փնտռողներ: Այս մասին կը յայտնեն Արցախի Հանրապետութեան պետական նախարարի աշխատակազմի տեղեկատուութեան եւ հասարակայնութեան հետ կապերու բաժնէն:
ՙԶգալով աշխատանքի առաջարկի ու պահանջարկի մեծ ծաւալը` որոշում կայացուցած են աշխատանքի տօնավաճառի միջոցով կազմակերպել գործատուներու եւ աշխատանք փնտռողներու հանդիպումը: Յոյս ունինք, որ աշխատանք փնտռող մեր համաքաղաքացիներն ու գործատուները կը գտնեն իրար եւ փոխշահաւէտ պայմանաւորուածութեան կը յանգին: Այդ պիտի ըլլայ կառավարութեան աջակցութիւնը ե՛ւ ընկերային խնդիր լուծելու, ե՛ւ տնտեսութեան զարգացման խթան ապահովելու համար՚, իր խօսքին մէջ նշած է Արտակ Բեգլարեանը:
Պետական նախարարը ընդգծած է աշխատանք եւ աշխատող գտնելու գործընթացի դիւրացման, զբաղուածութեան ոլորտին մէջ որակաւորման բարձրացման եւ այլ յարակից ուղղութիւններով Արցախի կառավարութեան շարունակական ջանքերու իրականացման վճռականութիւնը:
Ա. Բեգլարեան գործադիր իշխանութեան ներկայացուցիչներու հետ շրջած է բոլոր տաղաւարներով, շփուած է գործատուներու եւ աշխատանք փնտռող քաղաքացիներու հետ, ծանօթացած է տեղեկատուական արհեստագիտութիւններուն, սպասարկման, շինարարութեան, արտադրութեան, կրթութեան, առողջապահութեան եւ այլ ոլորտներուն մէջ առկայ աշխատատեղիներու ցանկին: