Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց ԱՄՆ Հայոց Արեւելեան թեմի Պոսթոնի շրջանի Հայփոյնթ համայնքի ուխտաւորները` առաջնորդութեամբ հոգեւոր հովիւ արժանապատիւ Տ. Վարդ քահանայ Կէօզալեանի:
Հանդիպման սկիզբը արժանապատիւ Տէր Հայրը ներկայացուց ուխտաւորները` հայցելով Նորին Սրբութեան օրհնութիւնը:
Այնուհետեւ Ամենայն Հայոց կաթողիկոսը իր օրհնութիւնն ու պատգամը փոխանցեց ուխտաւորներուն` կարեւորելով ուխտագնացութիւններու կազմակերպումը դէպի Հայաստան եւ Մայր Աթոռ Սուրբ Էջմիածին, որոնք կը նորոգեն հայորդիներու ազգային, հոգեւոր ապրումները` հաղորդ դարձնելով սեփական ինքնութեան եւ հոգեւոր արժէքներուն:
Զրոյցի ընթացքին Հայոց Հովուապետը նաեւ անդրադարձ կատարեց Արցախի մէջ առկայ իրավիճակին եւ հայ ժողովուրդին առջեւ ծառացած մարտահրաւէրներուն` վստահութիւն յայտնելով, որ հայորդիները լաւատեսութեան ոգիով եւ զօրեղ հաւատքով կը յաղթահարեն բոլոր դժուարութիւնները:
Հանդիպման ընթացքին Ամենայն Հայոց կաթողիկոսն իր մասնաւոր գնահատանքն ու օրհնութիւնը բերաւ արժանապատիւ Տ. Վարդ քահանայ Կէօզալեանին նախանձախնդիր ու նուիրեալ ծառայութեան համար:
Վեհափառ Հայրապետը պատասխանեց նաեւ ուխտաւորներուն հարցումներուն, որոնք կը վերաբերէին Մայր Աթոռի առաքելութեան ու գործունէութեան:
