Երէկ Ռուսիոյ Դաշնութեան Սոչի քաղաքին մէջ նախագահ Վլատիմիր Փութին եւ Թուրքիոյ նախագահ Ռեճեպ Թայիփ Էրտիղան գումարեցին իրենց գագաթաժողովը: Այս առիթով, Ռուսիոյ փոխվարչապետ Ալեքսանտր Նովաք յայտարարեց, որ երկու կողմերը համաձայնեցան ռուսական կազի արտածումը դէպի Թուրքիա շարունակել, տարեկան 26 միլիառ խորանարդ մեթր ծաւալով: Այս կազի փոխարժէքին մէկ մասը Թուրքիա պիտի վճարէ ռուսական ռուպլիով: Ըստ Նովաքի, երկու երկիրները պիտի սկսին իրարու վճարում կատարել իրենց երկիրներու դրամանիշով:
Ռուսիոյ Դաշնութեան նախագահի խօսնակ Տմիթրի Փեսքով յայտարարեց, որ ժողովը տեւած է չորս ժամ: Ըստ Փեսքովի, Սուրիան եղած է օրակարգի հիմնական նիւթերէն մէկը եւ Ռուսիա շեշտած է այդ երկրի կայունութեան կարեւորութիւնը իր դրացի երկիրներուն համար: Իր կողմէ, Թուրքիոյ նախագահութեան խօսնակը յայտարարած էր, որ Սուրիոյ մէջ թրքական գործողութիւնը կրնայ սկսիլ որեւէ ատեն, առանց մէկէ մը հրաման առնելու:
