Հայաստանի մէջ 5-10 Սեպտեմբերին տեղի ունենալիք միջազգային ՙSTARMUS VI՚ փառատօնին մասնակցիլ եւ լուսաբանել փափաքող լրագրողներու հաւատարմագրման գործընթացը մեկնարկած է:
Հայաստանեան զանգուածային լրատուամիջոցներուն համար կը գործէ հայերէնով առանձնացուած ելեկտրօնային ձեւաթուղթ, որու միջոցով կ՛ընդունուին յայտերը` https://forms.gle/rG3UR5vuR26EnN9p7: Այն տեղադրուած է նաեւ STARMUS-ի կայքին մէջ` https://www.starmus.com/media-accreditation, ուր առանձնացուած տեղեկատուութիւն առկայ է հայաստանեան եւ միջազգային զանգուածային լրատուամիջոցներու ներկայացուցիչներուն համար:
Փառատօնի ծրագրին մանրամասնութիւնները ներկայացուած են կայքին մէջ` www.starmus.com/program:
ՙSTARMUS՚ փառատօնին շնորհիւ Հայաստանը Սեպտեմբերի առաջին տասնօրեակին պիտի դառնայ գիտութեան, արհեստագիտութիւններու, արուեստի ու երաժշտութեան համաշխարհային կեդրոն` հիւրընկալելով մեծանուն գինտականներ ու երաժշտութեան աստղեր: Միջոցառումը պիտի լուսաբանուի նաեւ միջազգային լրատուամիջոցներու կողմէ, որոնք պիտի անցնին իրենց համար նախատեսուած հաւատարմագրման գործընթացով:
ՙSTARMUS՚ փառատօնը մինչ այս տեղի ունեցած է Թեներիֆէի (Քանարեան կղզիներ, Սպանիա), Նորվեկիոյ, Զուիցերիոյ մէջ:
Հայաստանի մէջ ՙSTARMUS VI՚ գիտութեան եւ արուեստի փառատօնը տեղի պիտի ունենայ ՙSTARMUS VI. 50 տարի Մարսի վրայ՚ խորագրով եւ նուիրուած պիտի ըլլայ Հրատի վրայ Մարս 3 տիեզերակայանի առաջին վայրէջքի 50-ամեակին: Յատկանշական է, որ Մարս 3-ը տեղափոխած է դէպի Կարմիր մոլորակ հայ մեծանուն ճարտարապետ Ալեքսանտր Քեմուրճեանի Prop-M (փրոփ-էմ) ռոպոթը:
ՙSTARMUS՚ աշխարհահռչակ փառատօնը կապուած է Սիվըն Հոքինկի, Պրայըն Մէյի, Ալեքսէյ Լէոնովի եւ աշխարհահռչակ այլ յայտնի անուններու հետ, տեղի կ՛ունենայ 2011 թուականէն եւ կը միաւորէ գիտութիւնը, կրթութիւնը, արուեստն ու արհեստագիտութիւնները:
ՙSTARMUS՚ փառատօնը հիմնադրուած է աստղաբնագէտ Գարիկ Իսրայէլեանի եւ առասպելական ՙQueen՚ խումբի կիթառահար, աստղաբնագէտ Պրայըն Մէյի կողմէ` դառնալով համաշխարհային ճանաչում ունեցող գիտնականներ, Նոպէլեան մրցանակակիրներ, տիեզերագնացներ, մտածողներ, գիտութեան մշակոյթի ու արուեստի գործիչներ միաւորող հարթակ, որու շրջանակներուն մէջ անոնք հանրութեան հետ կը կիսուին իրենց գիտելիքներով, փորձով ու նորագոյն յայտնագործութիւններով: Անոնց միաւորումը մէկ հարթակի շուրջ հնարաւոր կը դարձնէ մեր ժամանակներու խնդիրներու վերհանումն ու լուծումներու շուրջ քննարկումները:
