Իտալացի փորձագէտները Քաղաքաշինութեան կոմիտէի եւ Ասիական զարգացման դրամատան համատեղ նախաձեռնութեամբ մշակած են Կումայրի պատմաճարտարապետական արգելոց-թանգարանի տարածքին կառուցապատման կանոնակարգման ուղեցոյց եւ գօտեւորման աշխատանքներու մեթոտաբանութիւն` միտուած Կիւմրիի պատմական միջավայրի քաղաքաշինական ամբողջականութեան պահպանման: Մինչ վերջնական տարբերակի հաստատումը` մշակուած փաստաթուղթերը կը ներկայացուին շահագրգիռ կողմերը` պատուիրատու գերատեսչութեան, համայնքի բնակիչներուն, տեղական ինքնակառավարման մարմիններուն, մասնագիտական հանրութեան:
Մասնաւորապէս` փաստաթուղթերու լրամշակուած տարբերակը քննարկուած է Քաղաքաշինութեան կոմիտէի պատասխանատուներուն հետ: Դիտարկուած են պատմական ժառանգութեան ամբողջականութեան պահպանման հիմնաւորումները եւ առաջարկուող գործիքակազմը:
Կատարուած աշխատանքը ներկայացուած է նաեւ Կիւմրի համայնքի ղեկավարի տեղակալ Դաւիթ Առուշանեանի գլխաւորութեամբ կայացած խորհրդակցութեան ընթացքին, որուն ժամանակ վերջինս կարեւորած է փորձագէտներու վերհանած հիմնախնդիրները: Ուշադրութիւն դարձուած է նաեւ արդիական այլ խնդիրներու` պատմական միջավայրի մէջ գովազդային եւ տեղեկատուական վահանակներուն ներկայացուող պահանջներու յստակացման ու հանրային տարածքներու կազմակերպման:
Ուղեցոյցն ու մեթոտաբանութիւնը մէկ անգամ եւս շրջանառուած են հիպրիտային ձեւաչափով կազմակերպուած աշխատաժողովի շրջանակին մէջ, որուն ընթացքին շահառու խումբերու, ոլորտի մասնագէտներու հնչեցուցած առաջարկները ներառուած են փաստաթուղթերուն մէջ: Ասիական զարգացման դրամատան կողմէ գործընթացը համակարգող իտալացի մասնագէտները անդրադարձած են նաեւ Կումայրի պատմաճարտարապետական արգելոց-թանգարանի եւ ամբողջ քաղաքի տարածքին վերաբերեալ հաւաքագրուած տուեալներու թուայնացման հնարաւորութեան:
Փաստաթուղթերու կազմութեան նախորդած են հետազօտական աշխատանքներ` հաւաքագրելու պատմամշակութային արգելոց-թանգարանի պատմական միջավայրի վերաբերեալ տուեալներ: Գործընթացին մէջ ներգրաւուած են նաեւ մասնագիտացուած բարձրագոյն ուսումնական հաստատութիւններու դասախօսները եւ ուսանողները: Նախաձեռնութեան շրջանակին մէջ կարեւորելով կրթական բաղադրիչը` կազմակերպուած են դասախօսութիւններ Հայաստանի ամերիկեան համալսարանին, նաեւ Ճարտարապետութեան եւ շինարարութեան Հայաստանի ազգային համալսարանին մէջ: Իտալացի փորձագէտները ուսանողներուն ներկայացուցած են ժառանգութեան պահպանութեան մեթոտաբանութեան, ինչպէս նաեւ տեղեկատուութեան թուայնացման առանձնայատկութիւնները:
Յաջորդ փուլին կը նախատեսուի ուղեցոյցի եւ մեթոտաբանութեան վերջնական տարբերակը տպագրել երկու լեզուով` հայերէն եւ անգլերէն: Ուղեցոյցը պիտի ընդգրկուի Քաղաքաշինութեան կոմիտէի համակարգմամբ ՙՇիրակ-4՚-ի համար մշակուող քաղաքաշինական ծրագրային փաստաթուղթի կազմին մէջ, որ կը ներառէ 3 մակարդակ` տարածքային ծրագրաւորում, գլխաւոր յատակագիծ, գօտեւորման նախագիծ: Այդ հնարաւորութիւն պիտի տայ ուղղորդելու եւ կանոնակարգելու համայնքին մէջ իրականացուող քաղաքաշինական գործընթացները` պահպանելով պատմական ժառանգութիւնը եւ քաղաքաշինական միջավայրի ամբողջականութիւնը: