ՀՀ Կրթութեան, գիտութեան, մշակոյթի եւ մարմնակրթութեան նախարարութեան աջակցութեամբ Հայաստանի պետական սիմֆոնիկ նուագախումբը եւ ՙՄշակոյթի աջակցման եւրոպական հիմնադրամը՚ 12-25 Օգոստոսին Երեւանի մէջ կը կազմակերպեն ՙՍիմֆոնիկ Երեւան՚ միջազգային երաժշտական փառատօնը:
Հայ երաժշտասէրները, ինչպէս նաեւ քաղաքին հիւրերը, ամէնօրեայ պարբերականութեամբ հնարաւորութիւն պիտի ունենան ունկնդրելու կամերային եւ սիմֆոնիկ հարուստ ցանկով 14 համերգ: Փառատօնի շրջանակին մէջ ելոյթ պիտի ունենան ժամանակի յայտնի երաժիշտները. դաշնակահարներ` Նիքիթա Մնտոյանցը, Վանեսսա Պենելլին, Սալիմ Աշքարը, Անահիտ Տիլպարեանը, Արմինէ Գրիգորեանը, Սոնա Բարսեղեանը, ջութակահարներ` Նենսի Ժուօն, Մարք Պուշքովը, Ճովանի Անտրէա Զանոնը, կիթառահար` Շուֆէյ Եանը, թաւջութակահարներ` Պրանոն Չօն, Սեւակ Աւանեսեանը, սրնգաահարներ` Նոյեմի Կէօրին, Գէորգ Աւետիսեանը, ֆակոթահար` Նիքոլայ Պօղոսեանը, քլարինեթահար` Ֆապրիցիօ Մելոնին, ինչպէս նաեւ Խաչատրեանի անուան դաշնամուրային եռեակը: Փառատօնի պաշտօնական նուագախումբն է Հայաստանի պետական սիմֆոնիկ նուագախումբը:
Համերգներու ընթացքին պիտի հնչեն դասական եւ ժամանակակից երաժշտահաններու` Վոլֆկանկ Ամատէուս Մոցարթի, Ֆրանց Շուպերթի, Փէօթր Չայքովսքիի, Անթոնին Տվորժաքի, Էտուարտ Էլկարի, Ֆրետերիք Շոփենի, Ֆրանսիս Փուլենքի, Ալեքսանտր Թանսմանի եւ բազմաթիւ այլ հեղինակներու ստեղծագործութիւններ: Պիտի ներկայացուին նաեւ հայ երաժշտահաններու` Ալեքսանտր Սպենդիարեանի, Արամ Խաչատրեանի, Ղազարոս Սարեանի, Ալեքսանտր Յարութիւնեանի, Էտուարտ Հայրապետեանի, Տիգրան Մանսուրեանի ստեղծագործութիւնները:
Համերգները պիտի ղեկավարեն խմբավարներ Դանիէլ Ռայսքինը, Կերկելի Մատարաշը, Սերկէյ Սմբատեանը:
ՙԵս հպարտ եմ այս հրաշալի քաղաքին մէջ ՙՍիմֆոնիկ Երեւան՚ միջազգային երաժշտական փառատօնի մեկնարկին առթիւ: Մեծ պատիւ է փառատօնը կեանքի կոչել Հայաստանի պետական սիմֆոնիկ նուագախումբի` մեր վաղեմի եւ թանկագին գործընկերներէն մէկուն հետ, որ կը կիսէ դասական երաժշտութեան ժառանգութեան առնչուող մեր գաղափարներն ու մօտեցումները: Վստահ եմ, որ այս փառատօնը մեր յաջող համագործակցութեան եւս մէկ օրինակ պիտի դառնայ, եւ բոլորին կոչ կ՛ընեմ միանալու միջազգային ճանաչում ունեցող երաժիշտներու մասնակցութեամբ երաժշտական այս տօնին՚, ըսած է ՙՄշակոյթի աջակցման եւրոպական հիմնադրամ՚ի նախագահ Կոնստանդին Իշխանովը:
Հայաստանի պետական սիմֆոնիկ նուագախումբի գեղարուեստական ղեկավար եւ գլխաւոր խմբավար Սերկէյ Սմբատեան նշած է, որ ՙՍիմֆոնիկ Երեւան՚ փառատօնի շրջանակին մէջ դասական երաժշտութեան անմոռանալի երեկոները տօն պիտի պարգեւեն Երեւանի բնակիչներուն ու հիւրերուն:
ՙՈւրախ եմ, որ ՙՄշակոյթի աջակցման եւրոպական հիմնադրամ՚ին հետ մեր համագործակցութիւնը տարէ տարի կ՛ընդլայնի, եւ նոր նախագիծերու ստեղծման ճանապարհին մեր մօտեցումներն ու ցանկութիւնները կը համընկնին: Վստահ եմ, որ փառատօնի շրջանակին մէջ Հայաստան այցելող բոլոր արուեստագէտները մեր երկրէն պիտի երթան` իրենց հետ տանելով հայ ունկնդիրին ջերմ ընդունելութիւնը, իսկ երաժշտասէրները փառատօնի 14 համերգներու երգացանկին մէջ պիտի գտնեն իրենց հոգեհարազատ երաժշտութիւնը՚, ընդգծած է Սերկէյ Սմբատեանը:
Ծրագրին կ՛աջակցին նաեւ Երեւանի քաղաքապետարանը, Հայաստանի պետական ֆիլհարմոնիան, Կոմիտասի թանգարան-հիմնարկը:
