ՀՀ արտաքին գործերու նախարար Արարատ Միրզոյեան ընդունած է Հայաստանի մէջ Առողջապահութեան համաշխարհային կազմակերպութեան (ԱՀԿ) նորանշանակ ներկայացուցիչ Ճիհան Թաւիլահը` հաւատարմագրման նամակը յանձնելու կապակցութեամբ:
Արարատ Միրզոյեան բարձր գնահատած է ԱՀԿ ծաւալած գործունէութիւնը Հայաստանի մէջ եւ երախտագիտութիւն յայտնած է Քովիտի դէմ պայքարի շրջանակներուն մէջ եւ համավարակի հետեւանքները յաղթահարելու գործին մէջ կազմակերպութեան աջակցութեան համար:
Միտքեր փոխանակուած են Հայաստանի մէջ տեղի ունեցող առողջապահական բարեփոխումներու եւ ԱՀԿ-ի հետ այդ հարցով համագործակցութեան վերաբերեալ: Արարատ Միրզոյեան ընդգծած է, որ Հայաստանի կառավարութիւնը յստակ քայլերու կը ձեռնարկէ Հայաստանի բնակչութեան կեանքի որակի շարունակական բարելաւման, այդ շարքին` առողջապահութեան որակի բարձրացման ուղղութեամբ:
Հանդիպման ընթացքին նախարար Միրզոյեան զրուցակիցին ուշադրութիւնը հրաւիրած է նաեւ 44-օրեայ պատերազմին հետեւանքով յառաջացած մարդասիրական մարտահրաւէրներուն, մասնաւորապէս` առողջապահական խնդիրներու լուծման ծիրին մէջ կարեւորելով միջազգային մասնագիտացուած կազմակերպութիւններու ներգրաւուածութիւնը:
