Երեւանի Ալ. Սպենդիարեանի անուան օփերայի եւ պալետի ազգային ակադեմական թատրոնի շէնքն ու Հանրապետութեան հրապարակը պիտի ունենան նոր լուսաւորութիւն: Երեւանի քաղաքապետարանի զարգացման եւ ներդրումային ծրագրերու վարչութեան պետի ժամանակաւոր պաշտօնակատար Արմէն Յարութիւնեան տեղեկացուց, որ աշխատանքները արդէն սկսած են:
ՙՆախ ըսեմ, որ հրապարակին վրայ առկայ շէնքերու գեղարուեստական լուսաւորութեան հետ որեւէ փոփոխութիւն տեղի պիտի չունենայ: Այստեղ փոփոխութիւնը կապուած է շէնքերու տանիքներուն վրայ տեղադրուած լուսարձակներուն հետ: Ներկայիս գործող լուսարձակները բաւական հին են, մէկ մասը չ՛աշխատիր: Կը նախատեսուի եղածները փոխարինել նորերով, ինչպէս նաեւ աւելցնել անոնց թիւը՚, ըսաւ Արմէն Յարութիւնեան:
Լուսարձակները, որոնք կը համապատասխանեն ժամանակակից պահանջներուն, պիտի գործարկուին տօնական օրերուն, համերգային միջոցառումներու ժամանակ, որ ինչպէս հրապարակը, այնպէս ալ յարակից փողոցները ունենան շատ աւելի լաւ լուսաւորութիւն: Ընդհանուր առմամբ, տեղադրուած պիտի ըլլայ շուրջ 20 նոր լուսարձակ: Ուժանիւթ խնայող ու ժամանակից լուսարձակներով Հանրապետութեան հրապարակը աւելի վառ տեսք պիտի ունենայ:
Ալ. Սպենդիարեանի անուան օփերայի եւ պալետի ազգային ակադեմական թատրոնի շէնքի պարագային նախատեսուած է փոխել գեղարուեստական լուսաւորութիւնը: Արմէն Յարութիւնեան նկատեց, որ եղած լուսարձակները, լուսատուները բաւական հին են ու այսօրուան տեխնիկական չափանիշերուն չեն համապատասխաներ:
ՙՇատ լուսարձակներ վնասուած են, սպասարկման առումով ալ բարդ հոլովոյթ է: Այժմ պիտի փոխուի ամբողջ ճարտարապետական լուսաւորութիւնը: Կրկին այս աշխատանքներուն մէջ առկայ է ուժանիւթի խնայողութեան բաղադրիչը՚, ըսաւ Արմէն Յարութիւնեան: Աշխատանքը նախագծային փուլին է, որ աւարտելէ յետոյ, պիտի յայտարարուի մրցոյթ: Հանրապետութեան հրապարակի եւ Ալ. Սպենդիարեանի անուան օփերայի եւ պալետի ազգային ակադեմական թատրոնի շէնքի լուսաւորութեան աշխատանքները պիտի աւարտին մինչեւ տարուան վերջ: Վերջնարդիւնքով Երեւանի կեդրոնը պիտի ունենայ աւելի վառ լուսաւորութեամբ շէնքեր ու փողոցներ:
Արմէն Յարութիւնեան ընդգծեց, որ Երեւանը կ՛առաջնորդուի այն սկզբունքով, որ լուսատուները ըլլան ուժանիւթ խնայող: Անոր խօսքով` ամէն տարի լուսաւորուած շէնքերուն քանակը կ՛աւելնայ եւ հիմնականին մէջ ձեռք կը բերուին ուժանիւթ խնայող լուսատուներ: Աշխատանքները շարունակական պիտի ըլլան:
