Ուքրանիոյ պատերազմը եւ քարիւղի ու բնական կազի գինին յաւելումը սկսան իրենց հետեւանքները ունենալ Եւրոպայի տնտեսութեան վրայ: Գերմանիա, որ կը համարուի Եւրոպայի տնտեսութեան շարժիչը, սկսած է տկարութեան նշաններ ցոյց տալ: Ըստ տնտեսագէտներու, կազի գինին յաւելումը եւ անոր ներածումի դադրեցումը ռուսական կողմէն, մեծ հաւանականութեամբ երկիրը պիտի մտցնեն տնտեսական անկումի հոլովոյթի մը մէջ: Ամենամեծ հարուածը ստացան ճարտարարուեստի, ծառայութեան, շինարարութեան եւ առեւտուրի հատուածները: Գերմանացի գործատէրերուն մէջ սկսած է մտնել կասկած, թէ երկիրը կ’ուղղուի դէպի տնտեսական անկում:
Միւս կողմէ, ԱՄՆ կարենալ սանձելու համար սղաճըª աւելցուց պարտքի տոկոսը, որպէսզի մարդիկ քիչ գնումով գոհանան, պարտքի չափը սահմանափակուի եւ քաղաքացին դրամը պահէ դրամատան մէջ: Սակայն այս քայլը ունի իր ժխտական հետեւանքները: Առաջինը այն է, որ աւելի քիչ թիւով նոր գործատեղիներ պիտի բացուին, աւելցնելով անգործներու թիւը: Երկրորդ, տնտեսութեան մէջ աճը պիտի դանդաղի եւ նոյնիսկ մտնէ ժխտական հոլովոյթ: Երրորդ, այս յաւելումը պիտի ազդէ զարգացող եւ երրորդ աշխարհի երկիրներուն վրայ, որոնց պարտքին մեծամասնութիւնը տոլարով է: Անոնք պիտի ստիպուին աւելի բարձր գումար վճարել իրենց ստացած պարտքին դիմաց, երբեմն զանոնք մղելով սնանկութիւն յայտարարելու:
