Հայաստանի կառավարութեան համար խիստ կարեւոր է, որ ուսման վարձավճարի պատճառով բարձր յառաջդիմութիւն եւ պատշաճ վարքագիծ դրսեւորող ոեւէ ուսանող չզրկուի մասնագիտական եւ բարձրագոյն կրթութիւն ստանալու հնարաւորութենէն: Այս մասին Ֆէյսպուքի իր էջով գրառում կատարած է ՀՀ փոխվարչապետ Համբարձում Մաթեւոսեանը` նշելով, որ սա անկիւնաքարային մօտեցումներէն է կառավարութեան նիստին հաւանութեան արժանացած Կրթութեան մինչեւ 2030 զարգացման պետական ծրագրի, որ դեռ պէտք է քննարկուի ու ընդունուի Ազգային Ժողովին կողմէ:
ՙՄիւս կողմէ, տարածքային համաչափ զարգացման հետամուտ ըլլալով, մենք նպատակ ունինք, որ կրթական ծառայութիւնները մատչելի ըլլան Հայաստանի իւրաքանչիւր քաղաքացիի համար իր իսկ բնակութեան վայրին մէջ:
Ռազմավարութեան մէջ յստակօրէն ամրագրուած է`
– Բոլոր ուսումնական հաստատութիւնները պէտք է ունենան ապահով եւ յարմարաւէտ շէնքային պայմաններ, պատշաճ կահաւորանք եւ ժամանակակից սարքաւորումներ,
– Մանկավարժի, դասախօսի աշխատանքը պէտք է պատշաճ վարձատրուի, որպէսզի բոլոր հաստատութիւններուն մէջ աշխատին որակեալ մասնագէտներ,
– Կրթական ծրագրերը պէտք է համապատասխանեն հասարակութեան եւ տնտեսութեան օրէ օր զարգացող պահանջներուն, ինչպէս նաեւ կրթութեան առաջադրուող միջազգային չափանիշերուն:
– Ի վերջոյ, մենք պէտք է ունենանք միջազգային միտումներուն համահունչ զարգացող կրթական համակարգ, որ պիտի ծառայէ ինչպէս մեր քաղաքացիներուն, այնպէս ալ գրաւիչ պիտի ըլլայ արտերկրի երիտասարդներու եւ սփիւռքի մեր հայրենակիցներուն համար, պիտո նպաստէ մտաւորական հայրենադարձութեան՚, նշած է Մաթեւոսեան:
Ան կարեւորած է նաեւ, որ կրթութեան փոխակերպման միջազգային միտումներու ծիրին մէջ ծրագիրը խնդիր կը դնէ, որ 2030 թուականին Հայաստանը ունենայ միջազգայնօրէն մրցունակ կրթական համակարգ:
